Финал: Испания – Аргентина

Аан дойду футболга XIII Чемпионата түмүктэнэрэ бу кэллэ. Финалга тахсар иһин киирсиигэ Испания – Францияны 2:0, оттон Аргентина – Англияны 2:1 ахсааннарынан кыайдылар.

Аны от ыйын 19 күнүгэр (Дьокуускай бириэмэтинэн от ыйын 20 күнүгэр сарсыарда 04:00 чааска) Испания уонна Аргентина сүүмэрдэммит хамаандалара Аан дойду чемпионун аатын ылар иһин киирсиилэрэ саҕаланыаҕа. Ол иннинээҕи күн Франция – Англия хамаандалара үһүс бириистээх миэстэ иһин оонньуохтара.

Оттон биһиги, «Дьулурҕан» хаһыат тэрийбит конкурспутугар киирдэххэ, биэс ыйытыктан – бастакытыгар, ол аата, «Финалга ханнык хамаандалар тахсыахтарай?» диэҥҥэ киирбит сылыктааһыҥҥа түмүктэрин таһаарабыт.

Ол курдук, финалга Испания – Аргентина тахсыахтара диэн сөптөөх хоруйдары: Андрей Неустроев, Андрей Филиппов, Егор Бурцев, Леонид Александров, Владлен Полятинскай, Прокопий Батюшкин, Семен Оготоев ыыппыттар. Кинилэр бары 1-дии очкону суруннулар.

Аны конкурс балаһыанньатын быһыытынан, финал ханнык ахсаанынан түмүктэнэрин, ханнык хамаанда үһүс бириистээх миэстэни ыларын уонна Чемпионат бастыҥ футболиһынан ким буоларын сөпкө ааттыахтарын наада.

Онон, син аан дойду Чемпионатыгар курдук, биһиги конкурспутугар сытыы тыҥааһыннаах ким кыайара эрдэттэн биллибэт киирсиилэр буола тураллар. Дьэ, Чемпионакка ханнык хамаанда, оттон Конкурска ким кыайалларын билэрбит чугаһаата.

Санатан эттэххэ, кыайыылаах – спорт таҥаһынан эргинэр «IRON COLLECTION» маҕаһыын cпортивнай көстүүмҥэ сертификатынан наҕараадаланыаҕа.

Саха сирин олохтоохторо, дьон-сэргэ биһирэбилин ылбыт «IRON COLLECTION» маҕаһыын салалтата, чуолаан Макар Зырянов биһиги көрдөһүүбүтүн ылынан, конкурска бириис туруорбутугар барҕа махтал!

Петр ПАВЛОВ.