Будаев турнирыттан аҕыс мэтээллээх…

Бурятия киин куоратыгар Улан-Удэҕэ, аан дойду чемпиона, спорт үтүөлээх маастара Борис Будаев бирииһигэр көҥүл тустууга 21-гэр диэри саастаахтарга норуоттар икки ардыларынааҕы XXXV турнир ыытыллан түмүктэннэ.

Бу сырыыга тас дойдуттан Монголияттан уонна Россия араас регионнарыттан барыта 120-чэ эдэр бөҕөс түмсэн күөн көрүстэ.

Күрэхтэһиигэ СР уонна РФ үтүөлээх тренерэ С.П. Сивцев салалтатынан Cаха сириттэн 18 эдэр бөҕөс кытынна. Кинилэр үчүгэй көрдөрүүнү ситистилэр. Ол курдук, Михаил Осипов 57 кг, Давид Чириков 74 кг уонна Нозим Сафаров 79 кг бастакы, Адам Николаев 97 кг иккис, Александр Жданов, Вадим Прядезников 57 кг, Максим Трофимов 65 кг, Степан Иванов 92 кг үһүс бириистээх миэстэни ыллылар.

Санатан эттэххэ, түһүлгэ бириискэ фондата: 800 тыһ. солк. (бастакы миэстэҕэ — 30, иккис миэстэҕэ — 20, үһүс миэстэҕэ — 10 тыһ. солк, кыайыылаах тренеригэр — 10 тыһ. солк. харчынан бириис).

Хаһан баҕарар буоларыныы, болҕомто кыайыылаахтарга ууруллар…

Бэйэтин саастыылаахтарыгар Россия түһүлгэтигэр миэстэлэһэ сылдьыбыт Михаил Осипов үчүгэй хапсыһыылары көрдөрдө. Кини бүтэһик быһаарыылаах тустууга монгол күүстээх баатырын очукуонунан ыраастык (12:2) кыайбытын көрөргө астык этэ.

Михаил Ньурбаттан төрүттээх, биллиилээх хапсаҕайдьыт Петр Осипов уола, билигин СР, РФ үтүөлээх тренерэ Степан Петрович Сивцев салалтатынан дьарыктанар. Манна сыһыары тутан эттэххэ, Михаил аны аҕыйах хонугунан Москваҕа буолар эр дьоҥҥо Россия чемпионатыгар кыттарга бэлэмнэнэр.

Оттон СР үтүөлээх тренерэ Иван Иванович Дмитриев иитиллээччитэ, Дьааҥы Арыылааҕыттан төрүттээх Давид Чириков 74 киилэҕэ тэҥнээҕин булбата. Кини былырыын бу түһүлгэҕэ үһүс буолбут буоллаҕына, бу сырыыга бастаата. Быһаарыылаах хапсыһыыга Иркутскай уолун, хапсыһыы олох бүтэһик сөкүүндэтигэр, гонг тыаһыан аҕай эрэ иннинэ эргитэн, кылбар кыайыыны ситистэ. Хата судьуйалар сиэрдээхтик сыһыаннастылар.

Мархаттан сылдьар Нозим Сафаров бастакы тренерэ Петр Петрович Черкашин, билигин СР үтүөлээх тренерэ Прокопий Семенович Иванов салалтатынан дьарыктанар. Сэмээр эттэххэ, бу уол кэнники үчүгэй тустуулары көрдөрөр. Салгыы дьаныһан дьарыктаннаҕына, күүстээх бөҕөс үүнэн тахсар чинчилээх. Син эмиэ хамаанда атын уолаттарын курдук. Нозим бу күрэхтэһиигэ улахан утарсыыны көрсүбэтэ, этэргэ дылы, барыларыттан тустуутунан биир төбө үрдүк турар буолан, кэбэҕэстик кыайталаата.

Ситиһииттэн уоскуйан, дуоһуйан хаалымыахха. Бу, Будаев турнирыгар Роман Кириллин, Анатолий Иванов курдук, манна, бэйэлэрин саастыылаахтарыгар бастыҥнарынан биллэр, киһи эрэ барыта эрэнэ кэтэспит бөҕөстөрө табыллыбатылар диэххэ сөп. Онон тренердэр салгыы хайдах быһыылаахтык үлэлииллэригэр инники соруктар син биир бааллар.

Түмүктээн эттэххэ, Бурятия көбүөрүгэр хамаандабыт үчүгэй көрдөрүүлэннэ. Бу уолаттар – биһиги улахан көбүөргэ инники эрэллэрбит буолаллар. Кинилэргэ болҕомто ууран, билиҥҥи чэпчэкитэ суох олоххо күүс-көмө буолан, салгыы сайдалларыгар бары өттүнэн өйөбүл ирдэниллэр.

Бу ситиһии, аҕыйах хонугунан буолуохтаах тустууларга: эр дьоҥҥо (от ыйын 30 — атырдьах ыйын 1 күннэрэ, Москва), бэтэрээннэргэ (от ыйын 25-28 күннэрэ, Москва), студеннарга (от ыйын 30 — атырдьах ыйын 1 күннэрэ, Москва) Россия чемпионаттарыгар төһүү буолуохтун! Бөҕөстөрбүтүгэр ситиһиилэри баҕаран туран, дойдубут тэбэр сүрэҕиттэн үчүгэй сонуннары кэтэһэбит.

PS: Уолаттарбыт барыллааһын уонна быһаарыылаах хапсыһыыларын, барыта уонча видеоны “Дьулурҕан” хаһыат телеграмҥа каналыгар t.me/dzulurgan көрүөххүтүн сөп.

Петр ПАВЛОВ.