Бокс. Путевкалар бааллар, саҥа маастар суох

Дьокуускайга «Кыайыы 50 сыла» Спорт дыбарыаһыгар боксаҕа Александр Иванович Федотов кэриэһигэр Бүтүн Россиятааҕы күрэхтэһии биэс күн устата ыытыллан түмүктэннэ.

А.И. Федотов Чурапчыттан төрүттээх, эдэр сааһыгар боксанан ситиһиилээхтик дьарыктаммыта. Саха сирин экономикатын министрин солбуйааччынан, РИК хампаанньа генеральнай дириэктэринэн үлэлээбитэ. 2010 с. ахсынньытыгар республика Боксаҕа федерациятын президенинэн талыллыбыта. Кылгас кэм иһигэр спорт бу көрүҥүн күүскэ өйөөн, кини сайдыытыгар биллэр-көстөр сэргэхсийиини таһаарбыта. Хомойуох иһин, 2012 с. олунньутугар кини 45 эрэ сааһыгар олохтон туораабыта. Александр Иванович сырдык кэриэһин ытыктаан, сыллата кини аатынан бу турнир ыытыллар, быйыл күрэхтэһии онус төгүлүн тэрилиннэ. Бу түһүлгэ сүрүн уратыта диэн — бастаабыттар эр дьоҥҥо дойду чемпионатыгар кыттар путевкалары ылаллар.

От ыйын 11 күнүгэр кыайыылаахтар ааттара билиннэ. Финал киирсиилэрэ бэрт сытыытык, интэриэһинэйдик аастылар. Ол курдук, 51 киилэҕэ икки саха уола бэрт былдьаста. Маныаха бэрт эрийсиилээх көрсүһүүгэ Хаҥаластан сылдьар Максим Припузов былырыыҥҥы кыайыылаах Иннокентий Слепцову (Мирнэй) сабырыйда. Максим утарсааччытынааҕар ордук күүстээх, курбуулуу сытыы охсуулара киниэхэ кыайыыны аҕалла.

// Кыайыыны ситистэ Максим Припузов, Саха сирэ.

54 кг ыйааһыннаахтарга Челябинскайтан кэлбит саха уола Тимур Стручков республика быйылгы чемпиона Андрей Егорову (Хаҥалас) баһыйа тутта.

57 киилэҕэ Мирнэй боксера Ниджат Казымов былырыыҥҥы ситиһиитин хатылаан, иккис сылын субуруччу бастаата.

60 кг ыйааһыҥҥа Саха сирин бу сыллааҕы икки чемпиона күөн көрүстэ. Мэҥэ-Хаҥалас ыччата Александр Сергучев, биир ыйааһын үөһэ тахсыбыт Рамазон Мамаджонову (Мирнэй) техника, тактика өттүнэн баһыйан кыһыл көмүс мэтээли ылла.

Үрдүк кылаас диэн хайдаҕын Иркутскайтан кэлбит аан дойдутааҕы кылаастаах маастар, Россия 2024 с. чемпиона Егор Шапочанскай көрдөрдө. Кини Вячеслав диэн ааттаах, Вячеслав диэн араспаанньалаах Приморскай кыраай боксерун үрүҥ хараҕын өрө көрдөрбөккө хотто.

Бу күн атын ыйааһыннарга кыайыыны ситистилэр: 63,5 кг — Иван Фидищенко (Алтайскай кыраай), 67 кг — Герман Львов (Саха сирэ), 71 кг — Сухраб Наибов (Москва), 92 киилэттэн үөһэ — Никита Михайлюк (Новосибирскай).

Маны таһынан 48, 80, 86, 92 киилэлээхтэргэ биирдии эрэ киһи баарынан дойду чемпионатыгар кыттар путевканы буор-босхо ыллылар: Роберт Васильев (Саха сирэ), Никита Колпашников (Владимирскай уобалас), Егор Бутаков (Иркутскай), Яков Седалищев (Саха сирэ).

Дьахталларга үс ыйааһыҥҥа күрэхтэһии ыытыллыахтааҕа, онуоха ким даҕаны кэлбэтэх, онон бэйэбит кыргыттарбыт туран эрэннэр бастаатылар: 48 кг Людмила Семенова, 60 кг Нарыйаана Васильева, 81 киилэттэн үөһэ Алия Оконосова.

Бу турнирга олус аҕыйах кыттааччы кэлбитин чопчулаан тураммын (эр дьоҥҥо 35, дьахталларга 3) ааспыттааҕы суруйуубар «Астыга суох күрэхтэһии» диэн ааттаабытым. Финал төһө даҕаны үчүгэйдик аастар, уопсай өйдөбүл син биир мөлтөһүөр буолла. Холобур, элбэх спортсмен кэлбитэ буоллар, хас даҕаны эдэр боксербут спорт маастарын нуорматын толоруон сөп этэ.

// 54 киилэ5э биир дойдулаахпыт Тимур Стручков бастаата.

Күрэхтэһии кэнниттэн 54 киилэҕэ кыайыылааҕынан тахсыбыт Тимур Стручкову кытта кылгастык кэпсэттим.

—Сааһым 21, Уус-Алдан улууһуттан сылдьабын. Бастакы тренерим Илья Петрович Иванов. Челябинскайга барбытым бэһис сылым. Онно товаровед үөрэҕэр үөрэнэн бүтэрдим. Быйыл муус устар ыйга Челябинскай куоракка «Кубок Танкограда» диэн Бүтүн Россиятааҕы күрэхтэһиигэ бастаабытым. Ол эрээри, онно икки эрэ кыайыылаах буоламмын, маастары толорботоҕум. Бүгүн Россия чемпионатыгар кыттар быраабы ыламмын үөрэ олоробун, — диэн сэһэргээтэ эдэр спортсмен.

Эр дьоҥҥо Россия быйылгы чемпионата Мордовия киин куоратыгар Саранскайга атырдьах ыйын бүтүүтэ саҕаланыаҕа.

Гаврил СТРУЧКОВ.

Ааптар түһэриитэ.