Бэтэрээн бөҕөстөрбүтүгэр ситиһиилэри!

От ыйын 25-28 күннэригэр Москваҕа, көҥүл уонна гректии-римнии тустууларга бэтэрээннэргэ Россия аһаҕас чемпионата ыытыллар. Бастакынан күрэхтэһиини от ыйын 26 күнүттэн гректии-римнии тустааччылар саҕалыыллар. Оттон көҥүл тустууктар аан күнтэн тусталлар.

Бэтэрээннэр тустуулара Россия, аан дойду үрдүнэн анал тосхолунан ыытыллар буолбута син ыраатта. Ол курдук, норуоттар икки ардыларынааҕы турнирдар, Россия чемпионаттара уонна Кубоктара, аан дойду чемпионата сыл аайы тэриллэллэр.

Быйыл саас Оренбург куоракка ыытыллыбыт Россия Кубогар саха бөҕөстөрүттэн Андрей Иннокентьев В дивизиоҥҥа 62 киилэҕэ гректии-римнии тустууга чемпион, көҥүл тустууга иккис миэстэни ылбыта. Вячеслав Стрекаловскай эмиэ В дивизиоҥҥа 78 киилэҕэ көҥүл тустууга иккис буолбута. Ити курдук, Михаил Захаров Кыргызстаҥҥа, Монголияҕа, Белоруссияҕа ыытыллыбыт норуоттар икки ардыларынааҕы турнирдарга ситиһиилээхтик кыттыбыта.

Бэтэрээннэр тустууларыгар саастарынан бөлөхтөр манныктар: А дивизион: 35-40 саастаахтар, В дивизион (41-45), С дивизион (46-50), Д дивизион (51–55), Е дивизион (56-60), Ф дивизион (61 – 65), Г дивизион (65-тэн үөһээ саастаахтар).

Бу чемпионакка Саха сириттэн 16 бөҕөс кыттар: Михаил Захаров (А дивизион – 62 кг), Марк Коркин (А – 62 кг), Георгий Кардашевскай, Тарас Неустроев (А – 78 кг), Андрей Иннокентьев (В – 62 кг), Василий Антонов, Николай Олесов (В – 70 кг), Егор Петров (В – 78 кг), Дмитрий Шадрин (В – 88 кг), Иван Захаров, Айаал Павлов (С – 70 кг), Прокопий Петров (С – 78 кг), Алексей Некрасов (С – 88 кг), Вадим Данилов, Захар Дьячковскай (Е – 62 кг), Валериан Неустроев (Г – 70 кг). Бу бөҕөстөр бары чемпионат көҥүл тустууга күрэхтэһиитигэр кытталлар.

Манна биири чопчулаан этиэххэ сөп. Хас биирдии бөҕөс бу чемпионакка усунуос төлүүрүн таһынан, сырыыларын барытын бэйэлэрэ төлөөн, уйунан кытталлар.

Чемпионат түмүгүнэн алтынньыга Иорданияҕа буолар бэтэрээннэргэ спортивнай тустууга аан дойду түһүлгэтигэр кыттыахтаах Россия хамаандата сүүмэрдэниэҕэ.

Санатан эттэххэ, былырыын Смоленскайга ыытыллыбыт Россия аһаҕас чемпионатыгар бэтэрээннэрбит 11 мэтээли ылары ситиспиттэрэ. Биһиги хамаандабытыттан Николай Иванов, Платон Саввинов уонна Иннокентий Данилов бастаабыттара. Оттон Александр Птицын, Алексей Николаев, Николай Баттахов, Вадим Данилов — иккис, Тимур Андреев, Айаал Павлов, Валериан Неустроев уонна Федот Соловьев – үһүс буолбуттара. Быйыл дьэ хайдах буолар?

Бэтэрээн бөҕөстөрбүтүгэр ситиһиилэри баҕарабыт!

Чемпионат туһунан сонуннары биһиги сайтпытыгар dzulurgan.ru кэтээн көрөн ааҕа сылдьыҥ.

Тосхол быһыытынан, Чемпионат көҥүл тустууга күрэхтэһиитэ от ыйын 27 күнүгэр — аан күҥҥэ, Дьокуускай бириэмэтинэн киэһэ 17:00 чаастан саҕаланар. 

Петр ПАВЛОВ.