Бастыҥнар сүүмэрдэннилэр

Ааспыт өрөбүл күннэргэ Дьокуускай куорат сөтүөлүүр сиригэр кумахха волейболга (пляжнай) дьахталларга уонна эр дьоҥҥо Саха Республикатын үрдүнэн бастыыр иһин чемпионат ыытылынна.

Бу күрэхтэһии – эһиил Ньурбаҕа ыытыллар Саха сирин норуоттарын IX спортивнай оонньууларыгар кыттар хамаандалары сүүмэрдиир сыаллаах-соруктаах буолан, кыттааччыта да элбэх, састааба даҕаны күүстээх буолла диэххэ сөп. Ол курдук, чемпионакка эр дьоҥҥо 20, дьахталларга 17 хамаанда күөн көрүстэ.

Түмүккэ эр дьоҥҥо Ленскэй хамаандата (паарата) бастаата. Иккис миэстэни Үөһээ Дьааҥы волейболистара ыллылар. Үһүс бириистээх миэстэҕэ Уус Алдан уолаттара таҕыстылар.

Эр дьоҥҥо салгыы миэстэлэри уонна эһиил Ньурбаҕа кыттар быраабы ыллылар: Таатта, Дьокуускай, Ньурба, Амма, Муома, Мэҥэ Хаҥалас, Чурапчы, Сунтаар, Кэбээйи, Уус Майа, Нам, Үөһээ Бүлүү уонна Хаҥалас хамаандалара.

Оттон дьахталларга республика киин куоратын волейболисткалара тэҥнээхтэрин булбатылар. Иккис миэстэҕэ Уус Алдан кыргыттара таҕыстылар. Уонна үһүс миэстэни Хаҥалас хамаандата ылла.

Салгыы миэстэлэри Горнай, Мэҥэ Хаҥалас, Чурапчы, Ленскэй, Ньурба, Нам, Үөһээ Бүлүү, Кэбээйи, Сунтаар, Амма, Таатта, Бүлүү уонна Үөһээ Дьааҥы улуустара ыллылар уонна Ньурбатааҕы оонньууларга кыттар буоллулар.

Санатан эттэххэ, Саха сирин норуоттарын IX спортивнай оонньуулара эһиил – 2027 сыл от ыйын 7-11 күннэригэр Ньурба улууһугар ыытыллыахтара.

«Дьулурҕан».