Бөҕөстөрбүт тоҕус мэтээллэннилэр

Эрдэ иһитиннэрбиппит курдук, Москваҕа – аҕам саастаахтарга көҥүл тустууга Россия аһаҕас чемпионата ыытыллан түмүктэннэ. Саха сирин хамаандата эриэ-дэхси көрдөрүүлэннэ.

Ол курдук, Михаил Захаров 35-40 саастаахтарга 62 киилэҕэ, Прокопий Петров 46-50 саастаахтарга 78 киилэҕэ, Захар Дьячковскай 56-60 саастаахтарга 62 киилэҕэ чемпион үрдүк аатын ыллылар.

Василий Антонов 41-45 саастаахтарга 70 кг, Андрей Иннокентьев 41-45 саастаахтарга 62 кг иккис, Айаал Павлов 46-50 саастаахтарга 70 кг, Николай Олесов 41-45 саастаахтарга 70 кг, Дмитрий Шадрин 41-45 саастаахтарга 88 кг уонна Валериан Неустроев 65-тэн үөһэ саастаахтарга 70 кг үһүс миэстэлэри ыллылар.

Аҕам саастаах көбүөр маастардарын бу ситиһиилэринэн эҕэрдэлиибит!

Онон тоҕус бөҕөспүт Россия аһаҕас чемпионатыгар мэтээл ылары ситистилэр. Балаһыанньа быһыытынан кыайыылаахтар уонна иккис миэстэлэммиттэр күһүн Иордания Амман куоратыгар буолар аан дойду чемпионатыгар кыттар быраабы ыллылар.

Бөҕөстөрбүт хапсыһыыларын видеотын “Дьулурҕан” телеграмҥа каналыгар t.me/dzulurgan көрүөххүтүн сөп.

Петр ПАВЛОВ.