Астыга суох күрэхтэһии

Дьокуускайга «Кыайыы 50 сыла» Спорт уораҕайыгар боксаҕа Александр Федотов кэриэһигэр сыллата ыытыллар Бүтүн Россиятааҕы турнир саҕаланна.

«Биһиги турнирбыт уратыта диэн «А» кылаастаах күрэстэртэн эр дьоҥҥо дойду чемпионатыгар путевканы биэрэр соҕотох түһүлгэ буолар. 2021 сыллаахха Ил Дархаммыт А.С. Николаев көрдөһүүтүнэн Россия боксаҕа федерациятын оччотооҕу салайааччыта Умар Кремлев, Федотов кэриэһигэр күөн күрэскэ итинник үрдүк быраабы биэрбитэ. Күрэхтэһии быйыл онус төгүлүн ыытыллар», — диэн кэпсээтэ Саха сирин боксаҕа федерациятын председателин бастакы солбуйааччы, спорт үтүөлээх маастара, олимпийскай призер Георгий Балакшин.

Үөрүүлээх аһыллыыга физкультура уонна спорт министрэ Л.Н. Спиридонов бары кыттыылаахтары эҕэрдэлээн туран, үөрүүлээх быһыыга-майгыга Рустам Дьяконовка (Нам) уонна Максим Припузовка (Хаҥалас) боксаҕа Россия спордун маастардарын дастабырыанньаларын итиэннэ бэлиэлэрин туттарда. Ил Түмэн депутата, олимпиец Г.Р. Балакшин, бокса федерациятын салайааччыта П.В. Алексеев, А.И. Федотов огдообото Марианна Федотова эҕэрдэ тыллары эттилэр.

Ол эрээри, быйылгы күрэхтэһиигэ олус аҕыйах кыттааччы кэлбитэ сөхтөрдө итиэннэ хомотто. Бастакы күн үс эрэ паара рингэҕэ күөн көрүстэ. Иккис уонна төрдүс күннэргэ эмиэ ситиччэлии киирсии былааннаммыт, үһүс күн — түөрт паара. Арай субуотаҕа, финалга, тоҕус охсуһууну көрүөхпүт.

Ол курдук, от ыйын 7 күнүгэр 54 киилэҕэ Челябинскайга үөрэнэр Уус-Алдан ыччата Тимур Стручков Саха сирин хамаандатыттан спорт маастара Ренат Захаровы баһыйа тутта. Эмиэ ити ыйааһыҥҥа эдэр маастар Андрей Егоров Александр Лютовы (иккиэн — Саха сирэ) хотто. 71 киилэҕэ Сухраб Наибов (Москва) Алтай кыраайыттан кэлбит Артем Шульц диэн уолу кыайда.

Уопсайа эр дьоҥҥо 35 боксер суруллубут, олортон 18 киһитэ — олохтоохтор. Барыта 10 регионтан киһи баар. Ол аата, бу сырыыга маастар нуормата көрүллүбэт, тоҕо диэтэххэ, ирдэбил быһыытынан 21 субъект бэрэстэбиитэллэрэ кыттыахтаахтар. Аны туран, түөрт ыйааһыҥҥа соҕотохтуу спортсмен киирбит, онон бу дьон буор-босхо Россияҕа кыттар путевкалары ылар дьоллоннулар.

Дьахталларга быйыл үс ыйааһыҥҥа күрэхтэһии биллэриллибитэ эрээри, биирдии бэйэбит кыргыттарбыт эрэ суруйтарбыттар, кэлии кыттааччы мэлигир.

Онон, туох да диэбит иһин, быйылгы турнир бары өттүттэн астыга суох күрэхтэһии буолар буолла.

Гаврил СТРУЧКОВ.

Ааптар түһэриитэ.