Андрей Филиппов: “Маннык конкурсу тэрийэн ыытаргытыгар улахан махтал!”

«Дьулурҕан» хаһыат, аан дойду дьоно барыта биһириир, бастакы нүөмэрдээх спордун көрүҥэр анаан тэрийбит конкурсугар кыайыылааҕынан Дьокуускай куорат 5 №-дээх спортивнай оскуолатын дириэктэрин солбуйааччы, спорт бэтэрээнэ Андрей Афанасьевич Филиппов — Хомпоруун таҕыста.

Киниэхэ IRON COLLECTION хампаанньа олохтообут бирииһэ – спортивнай көстүүм үөрүүлээх быһыыга-майгыга туттарылынна. Хаһан баҕарар буоларыныы, “Дьулурҕан” үгэһин быһыытынан, конкурс кыайыылааҕын кытта сэһэргэһии оҥоһуллар. Ол сиэринэн кыайыылаах санаатын иһиттибит.

-Андрей Афанасьевич, бастатан туран, конкурска кыайбыккынан эҕэрдэлиибит! Бастаан, ааҕааччыларга бэйэн тускунан кылгастык билиһиннэр эрэ.

-Маннык конкурсу тэрийэн ыытаргытыгар улахан махтал! Кыайыыбыттан улаханнык үөрэн турабын. “Дьулурҕан” конкурстарыгар уруккуттан кыттабын да, хаһан даҕаны бастыы илик этим.

Бэйэм Өлүөхүмэттэн төрүттээхпин, Чурапчы спорка оскуолатын үөрэнэн бүтэрбитим, көҥүл тустууга Сэбиэскэй Сойуус спордун маастарабын. Биһиги улуу тренербит Дмитрий Петрович Коркиҥҥа кылгастык дьарыктаммытым, кини куоракка киирэн хаалбыта. Кылааспытыттан биллиилээх тустууктарынан норуоттар икки ардыларынааҕы кылаастаах спорт маастардара Михаил Протопопов, Егор Алексеев уонна спорт маастардара элбэхтэр.

// А.А. Филиппов туһунан “Дьулурҕан” архыыбыттан эбии сырдатыы “Үбүлүөйгүтүнэн, Андрей Афанасьевич!” https://dzulurgan.ru/2024/12/үbүlүөjgүtүnen-andrej-afanasevich/

-Дьэ, конкурспутугар киирдэххэ, хайдах быһыылаахтык бастаатым дии саныыгын?

-Конкурска киирбит билгэлэри сайтка көрдөххө, дьон үксэ эрдэттэн финалга Франция – Испания көрсүөхтэрэ диэбит этилэр. Ити кинилэр турнир сеткатын ситэ үөрэппэтэхтэриттэн таҕыста дии саныыбын. Конкурска кыыһым уонна хас даҕаны билэр дьонум кыттыбыттара. Хас биирдии киһи, кимиэхэ ыалдьарынан, ол хамаанда бастыырыгар ыалдьаллар.

Оттон мин Испанияҕа туруорбутум диэн, өссө чемпионат саҕаланыан быдан инниттэн дьиэ иһигэр кыыспын уонна сиэммин кытта бэйэбит ким чемпион буолуой диэн таайыы-конкурсун ыыппыппыт. Онно ырытыһыы буолбута. Ол иһигэр аһара ырытыы, ону-маны хасыһан ааҕыы, билии киһини буккуйан кэбиһэр. Төбөҥ элбэх инфомациянан туолан хаалар. Испания икки сыллааҕыта Европа чемпиона буолбута. Ол састаабын билигин да тута сылдьар, сүрүннээн эдэрдэр. Онон саамай күөгэйэр күннэригэр сылдьаллар.

Аргентинаҕа Месси, Англияҕа Кейн, Францияҕа Мбаппе, Португалияҕа Криштиану, Египеккэ Салах, Норвегияҕа Холланд курдук биирдии чорбойор киһилээхтэр. Оттон Испания хамаандатыгар бары линияларга барытыгар тэҥ күүстээх футболистар бааллар. Ямаль 19 эрэ саастаах эдэр уол буоллаҕа. Саҥа тахсан эрэр талаан. Кини Месси, Мбаппе, Криштиану таһымыгар тахса илик. Онтон Аргентина – 18 киһитэ аан дойду чемпиона, түөрт сыл анараа өттүгэр. Онон саас ылан, сааһыран истэхтэрэ дии. Футбол диэн сүрүннээн сүүрүү, дыхалка… Төҕө да эн дьарыктаммытын үрдүнэн сааһырдаҕын аайы хамсаныыҥ, реакцияҥ, координацияҥ уларыйан, мөлтөөн иһэр. Ол да буоллар, бу чемпионакка мин Месси да буоллун, Криштиану да буоллун, 40 саастарыгар диэри итинник улахан таһымҥа оонньуу сылдьалларыттан сөҕөбүн эрэ.

Мин билгэлээһиним кыайыылаах буолуутугар наһаа элбэҕи билэ-көрө, төбөбүн сынньа сатаабакка, үксүн чемпионат инниттэн «күөх экраҥҥа» ырытыылары көрбүтүм-истибитим уонна бэйэбэр түмүктээһиннэри оҥорбутум оруобуна сөп түбэстэ.

Месси сэмэй киһи дии саныыбын. Кини аһара мин диэн түөһүн охсуммат. Ол иһин, хамаандаҕа мин эрэ диэбэт. Ол үрдүнэн 8 голу киллэрдэ, 4 голга паастаата. Рекордка бара сатаабата.

Биирдэ Канберраҕа быһыылаах, Австралияҕа кинини анаан ыҥыран баран, эрдэттэн сэрэппэккэ, пааматынньыгын аспыттар. Сюрприз оҥорбуттар. Ону Месси кэлэн баран соһуйбут аҕай. Маны билбитим эбитэ буоллар, кэлиэ суохтаах этим, хайдах бэйэм бэйэбэр пааматынньык арыйабын диэбит. Дьиҥэ кини Эйэ уонна Спорт посола буоллаҕа, аан дойду кэрэхсиир, билинэр киһитэ.

-«Дьулурҕан» хаһыакка тугу баҕарыаҥ этэй?

-“Дьулурҕан” хаһыакка, билиҥҥи элбэх сүүрээннээх олоххо сүтэн-симэлийэн хаалбакка, үүнэ-сайда турарыгар баҕарабын! Өссө да биһиэхэ спорду сырдата, кэпсии-ипсии сылдьаргытыгар! Мин эһигини, хаһыакка ааҕарым диэн, эһиги боротокуолунан буолла-хаалла диэн сырдаппаккыт, үгүс хаһыаттарга буолан ааспыт күрэхтэһии боротокуолун суруйуу буолааччы. Эһиэнэ киэҥник ырытыы, дьүүллэһии, санаа атастаһыыта буолар. Холобур, бу конкурс да тэрийиигит киһини, ааҕааччыны толкуйдатарга, ырытарга көҕүлүүр, угуйар. Ааҕааччы бэйэтэ толкуйдуур, ырытар…

-Дьон үксэ билигин сайыҥҥы кэмҥэ уоппуска, оттон эн үлэлии сылдьар эбиккин…

-Билигин үлэлии сылдьабын. Чэпчэки атлеттарбытын эрчийэбит, бэлэмниибит, анал эрчийэр түмсүү тэрийэбит. Оскуолабыт иитиллээччитэ Богдан Луценко соторутааҕыта Сочига иккис уонна үһүс миэстэлэри ылла. Сүрүннээн «Өрөгөйгө», манежтарга дьарыкпытын ыытабыт. Ити курдук, Сергей Сотников, Тамура Корнилова, Илияна Куприянова, Сандаара Бессонова уо.д.а. курдук күүстээх чэпчэки атлеттардаахпыт.

Аны дуобатчыттарбытын кытта үлэлэһэ сылдьабыт. Кинилэр анал бэлэмнэниини баран, билигин Санкт-Петербурга «Белые ночи» турнирга кытта сылдьаллар.

-Андрей Афанасьевич, эн билигин кыайыылаах буолаҥҥын IRON COLLECTION маҕаһыынтан спортивнай көстүүмүнэн наҕараадаланныҥ. Онон бу маҕаһыын, бириис туһунан санааҕын этэрин буоллар.

-IRON фирманы биһиги уруккуттан билэбит. Биһиэхэ, 5-с нүөмэрдээх спортивнай оскуолаҕа тустуу күрэхтэһиитигэр икки сыл бирииһинэн көмөлөспүттэрэ. Көрдөрбүт таҥастарыттан бэйэбэр сөрү-сөп, лоп-бааччы олорор спортивнай көстүүмү талан ыламмын сүрдээҕин үөрэн, астынан турабын. Арба, ити этэн аһарбыт Россия икки төгүллээх чемпиона Богдан Луценко бу маҕаһыын тэрийбит “Эдэр спортсмеҥҥа” диэн бирииһин лауреатынан буолбута.

IRON маҕаһыын салалтатын уонна үлэһиттэрэ маладьыастар диибин. Кинилэр нууччалыы эттэххэ, билигин Саха сирин брендэ буоллулар. Оҥорбут спортивнай таҥастарын дьон сөбүлээн кэтэр, атыылаһар. Өссө сайдан, үүнэн Россияҕа, аан дойдуга биллэллэригэр, саха спорда сайдарыгар күүс-көмө буолалларыгар баҕарабын. Спорт эйгэтигэр кинилэри бары билэллэр. Сырдык өй-санаа кинилэри мэлдьи иннигэр анньан, сирдээн истин. Оччоҕо үчүгэйинэн сананар киһи – үтүө дьыаланы оҥорор.

-Андрей Афанасьевич, өссө төгүл кыайыылаах буолбуккунан эҕэрдэлиибит!     

Сэһэргэстэ Петр ПАВЛОВ.      

Ааптар хаартыската.