Андрей Филиппов инники таҕыста

Футболга аан дойду чемпионатыгар үһүс миэстэни ханнык хамаанда ыларыгар Франция уонна Англия көрүстүлэр. Түмүккэ 6:4 ахсаанынан Англия кыайда.

Онон “Дьулурҕан” хаһыат бу чемпионакка анаан тэрийбит конкурсугар “Үһүс бириистээх миэстэни ханнык хамаанда ылыай?” диэн биир ыйытык түмүгэ билиннэ.

70 киһи кыттыбыт конкурсугар Англия үһүс миэстэни ылыа диэн үс киһи сөпкө эппит: Андрей Филиппов, Айтал Андреев уонна Андрей Александров. Онон кинилэр, конкурс усулуобуйатын быһыытынан, 1-дии очкону суруннулар.

Бу иннинэ, “финалга Испания – Аргентина тахсыахтара” диэн сөптөөх хоруйдары: Андрей Неустроев, Андрей Филиппов, Егор Бурцев, Леонид Александров, Владлен Полятинскай, Прокопий Батюшкин, Семен Оготоев ыыппыттара. Кинилэр бары 1-дии очколаахтар.

Онон билиҥҥитэ Дьокуускай куорат 5 №-дээх спортивнай оскуолатын дириэктэрин солбуйааччы, көҥүл тустууга ССРС спордун маастара Андрей Филиппов 2 очколаах инники таҕыста.

Аны конкурс балаһыанньатын быһыытынан, ханнык хамаанда бастыырын, финал ханнык ахсаанынан түмүктэнэрин уонна Чемпионат бастыҥ футболиһынан ким буоларын күүтэбит. Ол барыта сарсын биллиэ. Биһиги dzulurgan.ru сайтпытын кэтээн көрө сылдьыҥ.

Конкурс кыайыылааҕа – спорт таҥаһынан эргинэр «IRON COLLECTION» маҕаһыын cпортивнай көстүүмҥэ сертификатынан наҕараадаланыаҕа.

Саха сирин олохтоохторо, дьон-сэргэ биһирэбилин ылбыт «IRON COLLECTION» маҕаһыын салалтата, чуолаан Макар Зырянов биһиги көрдөһүүбүтүн ылынан, конкурска бириис туруорбутугар барҕа махтал!

Петр ПАВЛОВ.