Спорт уонна Үлэ – кыайыыга сирдииллэр

Кырдьык да, бэс ыйа биһиги республикабытыгар – спартакиадалар ыытыллар ыйдара. Ол курдук, бэс ыйын 4-7 күннэригэр Үлэ коллективтарын, бэс ыйын 16-19 күннэригэр доруобуйаларыгар хааччахтаах спортсменнар «Дьулуур» уонна «Спортивные якутяне» диэн үөрэнээччилэр спартакиадалара ыытыллар.

Бу улахан таһымнаах, элбэх кыттааччылаах күрэхтэһиилэртэн биир дьоһуннаахтара – үлэ коллективтарын V спартакиадата буолар. Быйылгы тэрээһин – республикаҕа идэлээх сойуустар хамсааһыннара тэриллибитэ 105 уонна Саха сирин биллиилээх государственнай уонна политическай деятелэ И.Е. Винокуров төрөөбүтэ 130 сылларыгар ананар.

Спартакиада – спорт 11 көрүҥэр (волейболга, гиирэ анньыытыгар, чэпчэки атлетикаҕа, остуол тенниһигэр, канат тардыһыытыгар, харбааһыҥҥа, дьиэ кэргэнинэн күрэхтэһиигэ, 3х3 баскетболга, саахымакка, мини-футболга, буулдьанан ытыыга) ыытыллыаҕа.

Күрэс былдьаһыылар, Саха сирин уонна киин куорат спорка бастыҥ тутууларыгар: «Туймаада» стадиоҥҥа, «Кыайыы 50 сыла» Спорт дыбарыаһыгар, «Дохсун» күрэс уораҕайыгар, «Модун» спорт киинигэр, Саахымат-дуобат республикатааҕы киинигэр уонна «Чолбон» бассейнҥа буолуохтара.

Тэрийээччилэр иһитиннэрбиттэринэн, 18 хамаандаттан барыта 1200 киһи күрэхтэһиигэ кыттара күүтүллэр. Бу иннинэ тэрилтэлэргэ араас таһымнаах сүүмэрдиир күрэхтэһиилэр ыытыллан, буолаары турар спартакиадаҕа күүстээхтэр эрэ талыллан кэлэн күрэс былдьаһыахтара. «Олимпиада – олимпиецтарга эрэ буолбатах» диэбиккэ дылы, олох ханнык баҕарар эйгэтигэр бэйэ чемпионнара, сулустара бааллар. Ол курдук, бу иннинээҕи спартакиадаттан сүүмэрдэнэн – Бүтүн Россиятааҕы спартакиадаҕа ситиһиилээхтик кыттыбыт үлэһит-спортсменнар аҕыйаҕа суохтар.

Спартакиада сүрүн судьуйатынан – республикатааҕы таһымнаах судьуйа Юрий Владимирович Иванов, сүрүн секретарынан – бастакы категориялаах судьуйа Марианна Ивановна Васильева буолуохтара.

Бу улахан таһымнаах күрэхтэһиини эрдэттэн бэлэмнээн уонна тэрийэн ыытыыга Саха Республикатын Правительствотын председателин солбуйааччы Сергей Местников салайааччылаах республикатааҕы анал хамыыһыйа тэриллэн үлэтээтэ. Онон спартакиада үрдүк таһымнаахтык ыытылларыгар эрэл улахан.

Күрэхтэһиилэри киирэн көрүү – босхо. Онон доҕотторгутун, бииргэ үлэлиир дьоҥҥутун, аймахтаргытын илдьэ кэлэн, спорт дьиҥнээх бырааһынньыгын үөскэтэргитигэр ыҥырабыт!

Үлэ коллективтарын спартакиадатын үөрүүлээхтик аһыы бэс ыйын 4 күнүгэр киэһэ 19:00 чаастан Н.Н. Тарскай аатынан «Туймаада» стадиоҥҥа буолуоҕа. Бэлиэ түгэни «Саха» национальнай көрдөрөр-иһитиннэрэр хампаанньа «күөх экранынан» быһа көрдөрөр.

Петр ПАВЛОВ.