Спартакиада кыайыылаахтара: Дьокуускай, Ньурба, Горнай

Республикабыт киин куоратыгар спорт адаптивнай көрүҥнэригэр «Дьулуур» XV Спартакиадата үрдүк тэрээһиннээхтик ыытыллан түмүктэннэ. Үбүлүөйдээх күрэхтэһиигэ 22 хамаандаттан барыта 850 киһи күрэс былдьаста. 

Түөрт күн устата спорт бастыҥ тутууларыгар тыҥааһыннаах күрэстэһиилэр оргуйан олордулар. Спортсменнар кыайыыга дьулуурдарын, хаһааҥҥыттан даҕаны сытыы дьүккүөрдэрин көрдөрдүлэр. Этэргэ дылы, ким утумнаахтык дьарыктаммыт – ол кыайыыны ситистэ.

Саха Республикатын Правительствотын председателин солбуйааччы, спорт адаптивнай көрүҥнэригэр «Дьулуур» XV Спартакиаданы бэлэмнээн уонна тэрийэн ыытар республикатааҕы анал хамыыһыйа салайааччыта Сергей Местников күрэхтэһии кыттааччыларыгар туһаайан эппитин курдук, маннык улахан таһымнаах күрэс түһүлгэтигэр кыттыбыт хас биирдии киһи – Саха сирин физическэй култууратын уонна спордун сайдыытыгар саҥа үктэл оҥоһулларыгар сүҥкэн кылааттарын киллэрдилэр.

Кырдьык да, Спартакиада – тэрийээччилэр, тренердэр, волонтердар, улуус баһылыктарын, туһааннаах салайааччыларын көмөлөрүнэн үрдүк таһымнаахтык ыытылынна. Күрэхтэһии тэриллиитигэр бары усулуобуйа барыта тэрилиннэ.

Хамаанданан түмүк маннык буолла:

Бастакы бөлөххө: 1 миэстэ – Дьокуускай, 2 миэстэ – Мэҥэ Хаҥалас, 3 миэстэ — Бүлүү.

Иккис бөлөххө: 1 миэстэ — Ньурба, 2 миэстэ — Чурапчы, 3 миэстэ — Үөһээ Бүлүү.

Үһүс бөлөххө: 1 миэстэ — Горнай, 2 миэстэ — Орто Халыма, 3 миэстэ — Эдьигээн.

Спартакиадаҕа саҥа киллэриллибит, Анал байыаннай дьайыы бэтэрээннэрин ытыыга күрэхтэһиитигэр таатталар бастаатылар, уус алданнар иккис, чурапчылар үһүс буоллулар. Санатан эттэххэ, күрэхтэһии спорт сэттэ көрүҥэр ыытылынна: олорон эрэн волейболга, голболга, чэпчэки атлетикаҕа, остуол тенниһигэр, дуобакка, саахымакка, сахалыы оҕунан ытыыга.

Кыттааччылар барыта 105 комплект кыһыл көмүс, үрүҥ көмүс уонна боруонса мэтээллэри үллэстэн, сүргэлэрэ көтөҕүллэн, өссө дьаныһан туран дьарыктанан аныгыскы күрэхтэһиилэргэ ситиһиилээхтик кыттарга сананан тарҕастылар.

Петр ПАВЛОВ.

Антонина СЕМЕНОВА хаартыскалара.