Спартакиада дьону түмэр күүстээх

Ханныгын да иһин, бэс ыйа – Спартакиадалар ыйдара буолла. Ол курдук, Үөрэнээччилэр, Үлэ коллективтарын, Ис дьыала сотрудниктарын, Биэнсийэлээхтэр спартакиадаларын кэнниттэн тута сөрөөн аны Спорт адаптивнай көрүҥнэригэр “Дьулуур” XV Спартакиадата үөрүүлээхтик аһылынна.

Н.Н. Тарскай аатынан «Туймаада» стадиоҥҥа хамаандалар улуустарын баһылыктарын батыһан сэлэлии хаамсан киирэн, бу улахан тэрээһин суолтатын толору өйдөөн, улахан үөрүүгэ-көтүүгэ куустаран, кыахтарынан төһө баҕарар киирсэргэ санаалара көтөҕүллүбүтүн мустубут дьон уруйдуу көрүстүлэр.

Спартакиаданы үөрүүлээхтик аһыыга Саха Республикатын Правительствотын председателин солбуйааччы, бу күрэхтэһиини бэлэмнээн уонна тэрийэн ыытар республикатааҕы хамыыһыйа салайааччыта Сергей Местников, Ил Түмэн депутата Георгий Балакшин, СР Ыччат дьыалатыгар министрэ Петр Шамаев, СР физическэй култуураҕа уонна спорка министрэ Леонид Спиридонов, СР адаптивнай спорка киинин дириэктэрэ Ньургун Иванов эҕэрдэлээтилэр.

Кырдьык да, Спартакиада – дьону түмэр, сомоҕолуур, спордунан дьарыктаныыны көҕүлүүр күүстээх. Доруобуйаларыгар хааччахтаах дьон олоххо дьулуһуулара, тардыһыылара улахана манна көстөр. Ол эбэтэр, киһи кыаҕа муҥура суоҕа бу тэрээһин итэҕэтэр.

// Дьокуускай спорка бастыҥ тутуулара күрэхтэһии ыытарга көҥүл ыллылар. 

Спартакиаданы үөрүүлээхтик аһыы сиэрэ-туома хаһан баҕарар буоларыныы, хамаандалар сэлэлии хааман киириилэринэн саҕаланар, ол кэнниттэн салайааччылар, тэрийээччилэр эҕэрдэлэрэ этилиннэ, Спартакиада былааҕын тутан киирэн күөрэччи көтөҕүү буолла.

Былааҕы – адаптивнай спорка Спартакиаданы көҕүлээбит ытыктабыллаах дьон: Михаил Гуляев, Николай Дегтярев, Анастасия Михайлова, Петр Давыдов, Вера Душкевич, Николай Платонов стадиоҥҥа тутан киирэн, билиҥҥи күн бастыҥ спортсменнарыгар туттардылар. Күрэхтэһии сиэрдээхтик, сыысхала суох барарыгар спортсменнар ааттарыттан Роман Ибрагимов, сүрүн судьуйа Николай Цыпандин андаҕар эттилэр.

// Спартакиада кыайыылаахтара маннык кэрэ көстүүлээх мэтээллэринэн наҕараадаланыахтара.

Оттон Спартакиада уотун Россия, Саха сирин улахан таһымнаах күрэхтэһиилэргэ дорҕоонноохтук ааттаппыт биһиги адаптивнай спорка бастыҥнарбыт: Прокопий Николаев, Алена Дмитриева, Сергей Николаев, Евдокия Каторгина, Владимир Бородин, Анастасия Диодорова, Василий Стрекаловскай, Степанида Артахинова илии-илииттэн бэрсэн – Саха Республикатын спорт адаптивнай көрүҥнэригэр “Дьулуур” XV Спартакиадатын уотун уматар улахан итэҕэли Айаал Сивцевкэ сүктэрдилэр.

Дьэ, онон “Туймаада” стадион үрдүнэн Спартакиада уота дьону – сырдыкка, кэрэҕэ, үтүөҕэ уонна кыайыыга, дьулуурга угуйа үс күн устата күлүмнүү умайыаҕа.

// Хамаанданан кыайыылаахтар бириистэрэ маннык.

Тэрийээччилэр иһитиннэрбиттэринэн, быйылгы күрэхтэһиигэ 22 хамаандаттан барыта 851 киһи (ол иһигэр анал байыаннай дьайыы 25 кыттыылааҕа, коляскалаах 21 спортсмен) күрэхтэһэр. Кинилэр спорт алта көрүҥэр: олорон волейболга, чэпчэки атлетикаҕа, остуол тенниһигэр, буулданан ытыыга, оҕунан ытыыга, голболга күрэс былдьаһаллар. Эрдэ иһитиннэрбиппит курдук, Спартакиада чэрчитинэн дуобат уонна саахымат күрэхтэһиилэрэ саас буолбуттара. Онон барыта 106 комплект мэтээл оонньонор.

Күрэхтэһии түмүгэ үс бөлөҕүнэн араарыллан тахсар.

Бастакы бөлөх: Алдан, Бүлүү, Мирнэй, Мэҥэ Хаҥалас, Нерюнгри, Өлүөхүмэ, Хаҥалас, Дьокуускай.

Иккис бөлөх: Амма, Үөһээ Бүлүү, Ленскэй, Нам, Ньурба, Сунтаар, Таатта, Уус Алдан, Чурапчы.

Үһүс бөлөх: Абый, Аллайыаха, Анаабыр, Булуҥ, Үөһээ Халыма, Үөһээ Дьааҥы, Горнай, Эдьигээн, Кэбээйи, Муома, Аллараа Халыма, Өймөкөөн, Өлөөн, Орто Халыма, Томпо, Уус Маайа, Усуйаана, Эбээн Бытантай.

// Кыайыылаах хамаандалар маннык улахан, сиэдэрэй оҥоһуулаах кубоктарынан наҕараадаланыахтара.

Чэпчэки атлетикаҕа түөрт бөлөҕүнэн кыайыылаахтар быһаарылыннылар. Роман Ибрагимов (Дьокуускай), Саргылан Семенов (Уус Алдан), Виктория Петрова (Амма), Айаал Сивцев (Мэҥэ Хаҥалас) сэрэйиллибитин курдук кыахтаахтык бастаатылар.

Буулдьанан ытыыга Бүлүүттэн Василий Прокопьев уонна Дьокуускайтан Евдокия Каторгина үрдүк көрдөрүүлэннилэр. Ити курдук, күрэхтэһии үгэннээн ыытылла турар…

“Дьулуур” Спартакиадата бэс ыйын 19 күнүгэр – бээтинсэҕэ түмүктэнэр.

Петр ПАВЛОВ.

Ааптар хаартыскалара.