Сэрэбиэй түстэ, түһүлгэ түөрэҕэ кимиэхэ тосхойор?

Дьэ, өр күүппүт Дыгыммыт оонньуута саҕаланар күнэ бу ыган кэллэ. Син биир, бу оонньууларга кыттар боотурдар курдук, хас биирдии ыалдьааччы кэтэһэр, долгуйар күнэ-чааһа үүннэ.

Кырдьык, саха дэгит күрэһэр «Дыгын оонньуулара» саҥа улахан таһымҥа тахсан, элбэх киһини сэҥээрдэр. Ол курдук, эрдэ торумнаммытынан, бүгүн Республикатааҕы Медиакииҥҥэ “Бэргэн” уонна “Дыгын оонньууларын” кыттыылаахтарын сэрэбиэй тардыыларын сиэрэ-туома буолла. Онон күрэхтэһии бүгүҥҥүттэн саҕаланна да диэххэ сөп. Утарсааччылар бастакы эргииртэн саҕалаан ким кими кытта киирсэрин билэн, аны чопчу ол киһини кытта хайдах киирсэри торумнуур, ырытар буолуохтаахтар.

Билэргит курдук, быйылгы оонньууларга баһырхай бириистэр туруорулланнар, күрэхтэһии таһымын лаппа үрдэтэрин таһынан, эрдэттэн тыҥааһыны күүһүрдэн биэрдэ. Ол курдук, бастаабыт боотурга 3 мөл. солк. харчынан бириис уонна биир хостоох квартира, иккис миэстэлээххэ — массыына, үһүс буолбукка — 1 мөл. солк.

Ылан көрдөххө, Дыгын оонньуута – сахалар син биир Олимпиадаҕа холуур, кэтэһэр, бэлэмнэнэр түһүлгэбит. Өбүгэлэрбит үгэстэрин умнубакка, аныгы үйэҕэ саҥалыы тэринэн ыытар күрэхтэһиибит буоллаҕа. Саха сирин спорка министрэ Леонид Спиридонов эппитин курдук, бу оонньууларга биһиги Айыы Боотуру талыахпыт. Кыайыылааҕы аныгыскы оонньууларга диэри уостан түһэрбэккэ, номох оҥостон уруйдуохпут-айхаллыахпыт, холобур оҥостон ыччаттары чэгиэн-чэбдик олоххо көҕүлүөхпүт.

Быйылгы Дыгын оонньуутугар күөн көрсүөхтэрэ: Борис Сдвижков (Амма), Николай Матаннанов (Таатта), Яков Дмитриев, Артём Дьяконов (Кэбээйи), Тимофей Большаков, Алексей Соколов (Сунтаар), Алексей Созонов (Орто Халыма), Ариан Мярин (Томпо), Владимир Шологонов (Үөһээ Бүлүү), Юрий Копырин, Павел Друзьянов (Чурапчы), Руслан Слепцов (Мэҥэ Хаҥалас), Илья Карамзин (Уус Алдан), Александр Пшенников (Өлүөхүмэ), Айсен Семенов (Өлөөн), Иван Степанов (Дьокуускай, Хатас).

Пресс-конференцияҕа Дыгын оонньууларын сүрүн спонсора, саха дэгит күрэһин федерациятын президенэ Алексей Пинигин:

—Бу оонньуулар быйыл отут биирис төгүлүн тэриллэн ыытыллаллар. Маныаха бастатан туран, тэрийээччилэргэ: Дьокуускай куорат дьаһалтатыгар, спорка управлениетыгар, Спорт министиэристибэтигэр уонна бары спонсордарга махтанабыт. Күрэхтэһии сыллааҕы халандаарга киллэриллэн ыытыллар. Быһаарыылаах түһүлгэҕэ – үс сүүмэрдиир күрэхтэһииттэн талыллан бастыҥнар күөн көрсөллөр. Быйыл кыайыылаахха бириис улахан – квартира. Онон киирсии кытаанах буолара күүтүллэр, — диэн туран, Алексей Семенович бэйэтин аатыттан быйылгы Дыгын оонньуутун муҥутуур кыайыылааҕын тренеригэр «Бенелли» сааны бириис быһыытынан туттарарга этиитэ, түһүлгэ таһымын өссө сытыырхатан, өссө улаатыннаран биэрдэ.

Оттон Дыгын оонньуутун сүрүн судьуйата Иван Горохов быраабылаҕа уларыйыылар тустарынан быһааран биэрдэ. Ол курдук, бастатан туран, күрэхтэһии кэмигэр бөрүкүтэ суох түктэри быһыыламмыт киһиэхэ аны кыһыл уонна күөх өҥнөөх  карточкалар көрдөрүллүөхтэрэ. Кыһыл карточканы ылбыт киһи, күрэхтэһии ол көрүҥүттэн уһулларын туһунан биллэрдэ. Өссө биир саҥа киллэриинэн, мөккүөрдээх түгэни быһаарсыы – 5000 солк. уу харчынан төлөбүрдээх буолбут. Ити курдук, оонньуу биирдиилээн көрүҥнэригэр уларыйыылар киирбиттэр.

Манна даҕатан эттэххэ, күрэхтэһии сэттэ көрүҥҥэ: тутум эргииригэр, мас-рестлиҥҥэ, хапсаҕайга, 400 м сүүрүүгэ, Үс төгүл үс ыстаныыга, оҕунан ытыыга уонна тааһы ыраах илдьиигэ ыытыллыаҕа.

Ол кэнниттэн бу тэрээһин сүрүн түгэнэ саҕаланна. Бастаан, сахалыы дэгит күрэскэ «Бэргэн оонньууларын» аҕыс кыттыылааҕа: Владимир Потапов (Сунтаар), Саид Дмитриев (Мэҥэ Хаҥалас), Антоний Дмитриев (Кэбээйи), Эдуард Ксенофонтов (Горнай), Марк Захаров (Чурапчы), Эрсан Егоров (Дьокуускай), Степан Шадрин (Хаҥалас), Айсен Ботуев (Ньурба) сэрэбиэй тартылар, оттон кинилэргэ анал спортивнай көстүүм-таҥас туттардылар. Кыайыылаахха сүрүн бирииһэ — квадроцикл.

Дьэ онтон сүрүн күрэхтэһии кыттыылаахтара бастаан, көрүҥнэринэн кимниин хаһыс киирэллэрин сэрэбиэйин тартылар. Сиэрин ситэрэн, үгэс быһыытынан боотурдарга барыларыгар саҥа таҥас-көстүүм комплегын үөрүүлээх быһыыга-майгыга туттардылар.

Санатан эттэххэ, саха дэгит күрэһигэр «Дыгын оонньуулара-2026» бэс ыйын 27-28 күннэригэр Үс Хатыҥҥа «Туймаада» ыһыаҕын чэрчитинэн ыытыллыаҕа. Бастакы күн 15:00, иккис 12:00 чаастартан саҕаланаллар. Күрэхтэһии хаамыытын «Саха» национальнай көрдөрөр-иһитиннэрэр хампаанньа «күөх экранынан» быһа көрдөрүөҕэ.

Петр ПАВЛОВ.       

Ааптар хаартыскалара.