«Рассадин — Жербаев» киирсиилэрин иннинэ…

Россия чемпионатын 4, Азия чемпионатын 2 төгүллээх призера, студеннарга аан дойду чемпиона, Аан дойду Кубогын кыайыылааҕа, элбэх улахан таһымнаах күрэхтэһиилэргэ бастаабыт норуоттар икки ардыларынааҕы кылаастаах спорт маастара Виктор Рассадин бу күннэргэ Новосибирскайга анал эрчиллиини бара сылдьар.

Кини спарринг-партнерынан Россия күрэхтэһиитин эдэрдэргэ икки төгүллээх призера Владимир Бояновскай сылдьыһар.

Виктор чугастааҕы киирсиитэ – бэс ыйын 27-28 күннэригэр Улан Удэ куоракка буолар «Байкал Опен» көҥүл тустууга норуоттар икки ардыларынааҕы турнирын чэрчитинэн – Россия чемпиона, аан дойду чемпионатын боруонса призера, норуоттар икки ардыларынааҕы кылаастаах спорт маастара Евгений Жербаевы кытта киирсиитэ буолуоҕа.

PS: Виктор Рассадин видео-интервьютун «Дьулурҕан» телеграмҥа каналыгар — t.me/dzulurgan көрүөххүтүн сөп.

Санатан эттэххэ, кинилэр 2021 сыллаахха Улан Удэҕэ ыытыллыбыт Россия чемпионатыгар көрсөн тураллар, онно Жербаев 5:2 ахсаанынан хоппута. Бу сырыыга дьэ, хайалара кыайар?

Петр ПАВЛОВ.

Павел САРИН хаартыскалара.