“Дьулурҕан” футболга конкурсугар кимнээх бастаабыттарай?

Билигин 48 хамаанда кыттыылаах футболга Аан дойду XXIII чемпионата АХШ, Мексика, Канада куораттарыгар үгэннээн ыытылла турар. Биһиги да Сахабыт сиригэр спорт бу көрүҥүн сөбүлүүр киһи элбэх.

Мин хаһыат үлэһитэ уонна спорду сэҥээрээччи буолан, футболга конкурсу өссө 1992 сыллаахтан, оччолорго дойдубар, оройуоннааҕы «Мүрү саһарҕата» хаһыакка тэрийэн ыыппыт эбиппин.

Ол Европа чемпионата этэ. Кыайыылааҕынан лесопуун үлэһитэ Петр Макаров тахсан, өйдөбүнньүк бирииһинэн наҕараадаламмыта.

Оттон 1994 сыллаахха Аан дойду чемпионатыгар анаан тэрийбит конкурспар Бороҕоннооҕу РЭС-3 үлэһитэ, коллекционер (нумизмат) Валерий Давыдов бастаабыта уонна улуустааҕы ыччат, спорт управлениетын (начаалынньык Василий Тарскай) олохтообут «Полароид» фотоаппарытынан наҕараадаламмыта.

Итинтэн ыла, футболга Европа уонна Аан дойду чемпионаттарыгар – спорду таптааччыларга анаан хаһыатынан да, сайтынан даҕаны элбэх конкурсу ыытан кэллим. Ааҕааччылар көхтөөхтүк кытталларыттан, спорду, чөл олоҕу тарҕатарбыттан, дьон билиигэ-көрүүгэ тардыһыытыттан санаабыт көтөҕүллэр. Кыайыылаахтар араас сыаналаах бириистэри тутан үөрдүлэр-көттүлэр.

«Дьулурҕан» футболга конкурстарын кыайыылаахтара:

2000 сыллаахха Европа чемпионатыгар тэрийбит конкурспутугар кыайыылааҕынан Дьокуускай куорат олохтооҕо, Госкинохранилище кылаабынай специалиһа  Вера Никифорова тахсан, Саха сирин футболга федерацията (салайааччы А.Н. Скрыбыкин) олохтообут өҥнөөх телевизорын ылары ситиспитэ.

2002 сыллаахха өссө “Дьулурҕан” — “Республика бүттүүнэ-Вся республика” хаһыакка эрдэҕинэ, аан дойду XVII чемпионатыгар анаан эмиэ конкурс ыыппыппыт. Ол эрэн, чемпионат түмүктэнэ илигинэ хаһыат тохтотуллан хаалан, кыайыылааҕынан ким тахсыбытын булбакка сылдьабыт.

Евро-2012: кыайыылаах киин куораттан Николай Корякин – компьютернай планшет хаһаайынынан буолбута.

2014 сыллааҕы Аан дойду чемпионатыгар анаан ыыппыт конкурспутугар кыайыылааҕынан урбаанньыт Юрий Щукин тахсан, «Сахаэнерго» тэрилтэ (генеральнай дириэктэр Сергей Губскай) олохтообут ноутбук бирииһинэн туппута.

Евро-2016: Константин Пестряков, футбол бэриниилээх ыалдьааччыта Петр Гордеев бэлэмнээбит викторина-конкурсугар сөптөөх хоруйдары ыытан, «Саха сирэ» хаһыат (редактор Наталья Харлампьева) анал бирииһинэн наҕараадаламмыта.

Евро-2016: М.К. Аммосов аатынан Хотугулуу-Илиҥҥи федеральнай университет Биир кэлим атыыга ситимин управлениетын (начаалынньык Александр Герасимов) кытта бииргэ кыттыһан тэрийбит кыайыылаахтары билгэлээһин конкурсугар Дьокуускайтан Василий Данилов атыттартан элбэх очкону хомуйан, «Офсет» тэрилтэ олохтообут 15 тыһ. солк. харчынан бирииһин туппута.

2017 сыллаахха Конфедерация кубогар анаан тэрийбит конкурспутугар Алдантан тимир суол тэрилтэтин үлэһитэ Константин Павлов бастакы миэстэни ылан, «Asics” спортивнай таҥас-сап маҕаһыынын (салайааччы Александр Румин) аатыттан киниэхэ «Adidas Krasava” диэн, Конфедерация кубогын официальнай мээчигэ туттарыллыбыта.

2018 сыллаахха Россияҕа тэриллибит Аан дойду чемпионатыгар тэрийбит конкурспутугар Мэҥэ Хаҥаластан спорт бэриниилээх ыалдьааччыта В.П. Ларионов аатынан Майа орто оскуолатын хаһаайыстыбаннай чааска сэбиэдиссэйэ Федора Захарова кыайан, «Эхо столицы» тэрилтэ (дириэктэр Александр Прокопьев) анал бирииһинэн наҕараадаламмыта.

Евро-2020: билгэлээһин конкурс кыайыылааҕынан “Сахаэнерго” тэрилтэ юриһа Петр Федоров буолбута. Киниэхэ «Туймаада» стадион дириэктэрэ Александр Брызгалов, сыл устата кэлэн тренажерга эрчиллэригэр босхо анал абонемент туттарбыта.

2022 сыллаахха Катарга ыытыллыбыт Аан дойду чемпионатыгар анаан тэрийбит викторина-конкурспут кыайыылаахтарынан Иван Барашков, Николай Фомин, Николай Тихонов, Анфиса Слепцова буолбуттара. Кинилэргэ «Медведь» маҕаһыын (салайааччы Михаил Тарскай) сертификаттара туттарыллыбыттара.

Эмиэ бу чемпионакка анаан билгэлээһин конкурс тэрийбиппитигэр кыайыылаахтарынан Федора Захарова (Мэҥэ Хаҥалас), Айтал Андреев (Кэбээйи), Михаил Максимов (Дьокуускай) буолбуттара. Кыайыылаахтарга конкурс сүрүн спонсора – Илин эҥэр футболга бэтэрээннэрин хамаандатын (Николай Цыпандин) аатыттан Катартан аҕалыллыбыт футболканан уонна мээчигинэн наҕараадаламмыттара.

Евро-2024: викторина-конкурус кыайыылааҕынан Саха Республикатын Ил Дарханын уонна Правительствотын дьаһалтатыгар специалиһынан үлэһитэ Марианна Черкашина буолбута. Кини “Забота-Арчы” хаһыат (редактор Виктор Эверстов) анаабыт бирииһинэн наҕараадаламмыта.

// Катарга ыытыллыбыт аан дойду 2022 с. чемпионатын биир кыайыылааҕа Айтал Андреев. 

//2022 сыллааҕы аан дойду чемпионатыгар тэриллибит конкурс биир кыайыылааҕа Михаил Максимов. 

// Виктория Варламова «Сахаэнерго» тэрилтэ ноутбук бирииһин кыайыылаах Юрий Щукиҥҥа туттарар.

Быйыл эмиэ «Дьулурҕан» көҕүлээһининэн конкурс тэрилиннэ. Кыайыылаах — спорт таҥаһынан эргинэр IRON COLLECTION маҕаһыын спортивнай көстүүмүнэн наҕараадаланыа…

Ити курдук, сүүрбэччэ сыл устата “Дьулурҕан” футболга эрэ буолбакка, спорт атын да көрүҥнэригэр элбэх конкурсу ыытан кэллэ. Ол эрэн, спонсордар улахан, сыаналаах бириистэрэ үксэ футболга оонньонно. Онуоха биһиги бастатан туран, бириис булуутугар күүс-көмө, өйөбүл буолбут дьоммутугар: оччолорго спорт комитет специалиһа Александр Андреевич Поповка (Евро-2000), “Сахаэнерго” тэрилтэ отделын начаалынньыга Виктория Варламоваҕа (ЧМ-2014), Саха Республикатын футболга федерациятын чилиэнэ Николай Гаврильевич Цыпандиҥҥа (ЧМ-2022) уонна “Дьулурҕан” хаһыакка футболга анаан араас викториналары тэрийбит Петр Гордеевка уонна конкурстарга бириис туруорбут бары спонсордарга махталбыт улахан.

Петр ПАВЛОВ, “Дьулурҕан” хаһыат редактора.

Бастакы хаартыскаҕа: футболга 2022 с. аан дойду чемпионатыгар анаммыт конкурс кыайыылааҕа Федора Захароваҕа — конкурс спонсора Николай Цыпандин анал бириис туттарар.