Дьокуускай – оҕунан ытыыга Россия чемпионатын түһүлгэтэ

Олорбуппут өр-өтөр буолбата, Дьокуускай эмиэ улахан таһымнаах күрэхтэһиини көрсөр. Бу сырыыга, бэс ыйын 29 – от ыйын 3 күннэригэр Н.Н. Тарскай аатынан «Туймаада» стадиоҥҥа оҕунан ытыыга Россия чемпионата ыытыллыаҕа.

Онон сибээстээн бүгүн, Бэчээт дьиэтигэр бу чемпионакка анаан пресс-конференция буолла. Тэрээһини РФ спордун маастара, спорт төрүт көрүҥнэригэр уонна оонньууларыгар «Сахаада-спорт» ассоциациятын президенэ Александр Ким – Кимэн үүннээн-тэһииннээн ыытта.

// Саха сирин хамаандата чемпионакка маннык спортивнай көстүүмнээх буолуоҕа.

Пресс-конференцияҕа Саха Республикатын физическэй култуураҕа уонна спорка министрэ Леонид Спиридонов, СР оҕунан ытыыга федерациятын салайааччы Василий Ефимов, СР оҕунан ытыыга сүүмэрдэммит хамаандатын хапытаана Степанида Артахинова, буолаары турар чемпионат кылаабынай судьуйата Борис Олесов, СР сүүмэрдэммит хамаандатын сүрүн тренерэ Михаил Филатов кыттыыны ыллылар.

Кинилэр сүрүннээн, бу улахан таһымнаах бүтүн дойду күрэхтэһиитэ – Саха Республикатын Ил Дарханын, Россия уонна Саха сирин физическэй култуураҕа, спорка министиэристибэлэрин, РФ уонна СР оҕунан ытыыга федерацияларын көҕүлээһиннэринэн, тэрийиилэринэн ыытылларыгар махталларын биллэрдилэр.

// тренер М.М. Филатовка, чемпиону бэлэмнээбитин иһин наҕараада туттарылынна. Ситиһии сиэттиһэн истин! 

Чемпионакка бэлэмнэнии саҕаламмыта ыраатта. Саха Республикатын Правительствотын председателин солбуйааччы Сергей Местников салайааччылаах республикатааҕы анал хамыыһыйа тэриллэн, билигин үлэтин үгэнигэр сылдьар. Тэрийээччилэр этэллэринэн, бу чемпионат – спорт уонна доҕордоһуу бэлиэтинэн барыаҕа. Александр Ким быктаран аһарбытынан, манан дуоһуйан хаалбакка, СР оҕунан ытыыга спордун федерацията чугастааҕы сылга өссө улахан таһымнаах күрэхтэһиини тэрийэн ыытар соруктаах эбит.

Оттон буолаары турар чемпионакка Россия 24 регионуттан барыта 180-ча спортсмен кыттара күүтүллэр. Кинилэр ортолоругар Олимпиада, аан дойду, Европа, Россия чемпионаттарын кыайыылаахтара уонна призердара кэлэн күөн көрсүөхтэрэ, онон түһүлгэ састаабын күүстээх буолуо диэн эттилэр. Бочуоттаах ыалдьытынан – Россия оҕунан ытыыга спордун федерациятын президенэ Зоригто Манханов бэйэтинэн кэлиэҕэ.

Санатан эттэххэ, чемпионаты үөрүүлээхтик аһыы бэс ыйын 29 күнүгэр киэһэ 19:00 чаастан Н.Н. Тарскай аатынан «Туймаада» стадиоҥҥа буолар. Күрэхтэһии быһаарыылаах түгэннэрин МатчТВ «күөх экраҥҥа» көрдөрөрө былааннанар.

Оттон Степанида Артахинова: «Буолаары турар чемпионакка анал бэлэмнэнии бара турар. Үчүгэй көрдөрүүнү ситиһэргэ дьулуһабыт. Бу чемпионат – инникитин биһиги республикабытыгар оҕунан ытыы өссө сайдарыгар төһүү буолуо диэн эрэнэбин. Хамаандаҕа ситиһиини баҕарабыт», — диэн туран, Саха сирин сүүмэрдэммит хамаандатын чилиэнэ Али Лобашевка кыайыы эстафетатын анал бэлиэтин туттарбытын, мустубут дьон ытыс тыаһынан доҕуһуоллаатылар.

Тэрээһин биир бэлиэ түгэнинэн, оҕунан ытыыга ССРС спордун маастара, Саха сирин любитель спортсменнарын сойууһун председателэ Мария Семеновна Алексеева «Стрелы Олонхо» диэн саҥа тахсар кинигэтин билиһиннэриитэ буолла. Бу кинигэ кырдьык да, буолаары турар чемпионат ыалдьыттарыгар уонна спорду таптааччыларга күндү бэлэх буолара саарбахтаммат.

Дьэ, онон бэс ыйын 29 – от ыйын 3 күннэригэр «Туймаада» стадиоҥҥа буолар оҕунан ытыыга Россия чемпионатыгар кэлэн, спорт бырааһынньыгар кыттыһаргытыгар, бэйэбит хамаандабыт охчуттарыгар күүс-көмө, өйөбүл буоларгытыгар ыҥырабыт.

Петр ПАВЛОВ.

Ааптар хаартыскалара.