Биэнсийэлээхтэр Спартакиадаларыгар…

Бэс ыйын 12 күнүгэр киин куораппытыгар «Кыайыы 50 сыла» Спорт дыбарыаһыгар биэнсийэлээхтэр V спартакиадалара үөрүүлээхтик аһыллыбыта. Оттон иннинээҕи күн Саахымат-дуобат киинигэр саахымакка күрэхтэһии буолбута. Онно 17 улуустан 32 оонньооччу кыттыбыта. Күрэхтэһии түргэн саахымат быраабылатынан баран, сэттэ туурунан түмүктэнэн, кыайыылаахтар биллибиттэрэ.

Аҕам саастаах биэнсийэниэрдэр V Спартакиадаларыгар дьахталлар 58 саастарыттан, эр дьон 63-тэриттэн кытталлар. Хамаандаҕа 8 спортсмен киирэр, барыта 21 улуус, куорат кытынна. Бырагырааммаҕа саахымат, остуол тенниһэ, харбааһын, буулдьанан ытыы, чэпчэки атлетика, дартс, комбинированнай эстафета киирбиттэрэ. Ону таһынан бары кыттааччылар ГТО нуормаларын туттардылар итиэннэ сарсыардааҥҥы гимнастикаҕа күрэстэстилэр.

Саахымакка Дьокуускайтан Галина Эверстова, Уус-Алдантан Николай Бурнашев, 50 миэтэрэҕэ харбааһыҥҥа Ольга Ладыгина (Мирнэй) уонна Афанасий Васильев (Нам) – Спартакиада бастакы кыайыылаахтарынан буолбуттара.

Бэс ыйын 14 күнүгэр Спартакиада түмүктэннэ, киэһэ 17:00 чааска «Кыайыы 50 сыла» Спорт дыбарыаһыгар оонньуулары үөрүүлээхтик сабыы ыытыллынна.

Спартакиада сабыллыытыгар бары кыайыылаахтары, призердары наҕараадалааһын буолла. Ол курдук, 1000 м сүүрүүгэ дьахталларга Дария Федорова (Амма) инники күөҥҥэ таҕыста. Эр дьоҥҥо Нам спортсмена Афанасий Васильев барыларын куотта. Остуол тенниһигэр дьахталларга быһаарыылаах оонньууга Бүлүүттэн Светлана Михайлова – Калиста Романованы (Үөһээ Бүлүү) эрэллээхтик хотто.

Эр дьоҥҥо финал ураты хатыһыылаахтык, үрдүк тыҥааһыннаахтык ааста. Күөн көрсөөччүлэр – Аркадий Иванов (Уус-Алдан) итиэннэ Еремей Куприянов (Мэҥэ-Хаҥалас) иккилии оонньууну хардарыта ыланнар, кыайыылааҕы бэһис партияҕа быһаарыстылар. Маныаха 11:8 ахсаанынан хотон, Еремей Куприянов кыайыы үрдүк өрөгөйүн биллэ.

Ытыыга Валентина Сокольникова (Нам) уонна Айаал Захаров (Усуйаана) бастыҥ көрдөрүүлэннилэр.

ГТО туттарыытыгар Амма улууһун хамаандата бастаата, дартс диэн дротиктары сыалга быраҕыыга Чурапчы чулуу көрдөрүүлэннэ.

Спартакиаданы комплекснай эстафета түмүктээтэ. Бу көрүҥ «Көрдөөх стартарга» маарынныыр эбит. Онон бэрт сэргэх күрэхтэһии буолла. Саастаах дьоҥҥо бэркэ барсар эбит. Түмүккэ бастыҥ бириэмэни көрдөрөн, Мэҥэ-Хаҥалас улууһун хамаандата чорбойдо. Иккис миэстэни Чурапчы улууһа, үсүһү Үөһээ Бүлүү ыллылар.

Биэнсийэниэрдэр V Спартакиадалара үөрүүлээхтик түмүктэннэ. Уопсай түмүккэ үһүс үктэлгэ Нам улууһун сүүмэрдэммит хамаандата таҕыста. Иккис кэрдиискэ Амма улууһа таҕыста. Муҥутуур кыайыылааҕынан Мэҥэ-Хаҥалас улууһа буолла.

Күрэхтэһии саамай аҕа саастаах кыттааччылара – Мирнэйтэн Прасковья Ивановна Кондакова уонна Намтан Ион Ионович Васильев анал бирииһинэн бэлиэтэннилэр. Спартакиада биир сүрүн геройун быһыытынан Нам улууһун бэтэрээнин Афанасий Васильевы ааттыахха сөп, кини харбааһыҥҥа уонна сүүрүүгэ кыһыл көмүс мэтээллэри ылла. V Спартакиада бүттэ, аны биир сылынан тэтиэнэх биэнсийэлээхтэр эмиэ мустан күрэхтэһиэхтэрэ.

Гаврил СТРУЧКОВ.

Ааптар хаартыскалара.

PS: Ааптар өссө элбэх хаартыскаларын уонна видеоларын “Дьулурҕан” телеграмҥа каналыгар t.me/dzulurgan көрүөххүтүн сөп.