Бэйэ кыаҕын уонна тулуурун тургутуу

Дьокуускайга «Мир! Май! ГТО!» өрөспүүбүлүкэтээҕи бэстибээл ситиһиилээхтик түмүктэннэ. Барыта холбоон 5116 киhи туттарда. Саха сирин олохтоохторо V-тэн XVIII үктэлгэ тиийэ бэйэлэрин эт-хаан өттүнэн тургутан көрдүлэр уонна алта көрүҥнээх нормативтары биир кэлим толордулар.

Өрөспүүбүлүкэ Бырабыыталыстыбатын Бэрэссэдээтэлин солбуйааччы Анатолий Семенов ГТО кэлим көрүҥнэрин кыһыл көмүс бэлиэҕэ туттарда уонна: «Уопсастыбабыт күүстээх уонна чөл туруктаах буоларын туһугар!», — диэн бары олохтоохтору ыҥырда.

Бу сыралаах тэрээһиҥҥэ хас да көлүөнэ дьон бэйэлэрин кыахтарын боруобалаатылар: Дмитрий Устинов («Якутскэнерго» улахан маастара) нормативтары олоҕор маҥнайгытын туттаран, тута кыһыл көмүс бэлиэни ылла. Лена Ефимова (Аэропорт үлэһитэ, 36 саастаах) ГТО-ну атыттарга уонна оҕолорго үтүө холобур буолуу диэн бэлиэтээтэ. Евдокимовтар дьиэ кэргэн (Мария Алексеевна-71 саастаах, Павел Павлович-72 саастаах) иккиэн кыһыл көмүс бэлиэни ситистилэр.

Кинилэр сааһыран да баран, бэйэни чөл турукка тутар олус суолталааҕын уонна ГТО-ҕа кыттыһар дьон ахсаана сыллата элбиирин үөрэ көрөллөр. Егор Старков (кроссфит тириэньэрэ, 25 саастаах) оскуола сааһыттан утумнаахтык туттаран, куруук кыһыл көмүс бэлиэни ылар. Киниэхэ бу бэйэ күүһүн уонна тулуурун өссө төгүл боруобалааһын буолар.

Буолбут тэрээһин өрө көтөҕүллүүлээхтик, үрдүк таһымҥа ааста. Үс күн устата судьуйалар, волонтердар улахан эппиэтинэстээхтик уонна бэриниилээхтик үлэлээннэр күрэхтэһии таһымын өссө үрдэттилэр.

Биир кэлими «Туймаада» стадиоҥҥа, Култуура уонна сынньалаҥ киинигэр (ЦПКиО) уонна «Чолбоҥҥо» туттулар. Бэстибээл чэрчитинэн кыттааччыларга анаан «Доруобуйа дьаарбаҥката» үлэлээтэ.

Бастакы икки күн кыттааччылар күүс уонна сүүрүү туттардылар, үhүс (тиһэх) күн — сыhыарыылаах көрүҥнэри.

Сүрүн судьуйалар хамыыhыйаларын үлэтин ГТО Өрөспүүбүлүкэтээҕи киинин салайааччыта Ариян Александров баһылаата.

Бу улахан тэрээһини Саха Өрөспүүбүлүкэтин физическэй култуураҕа уонна успуорка министиэристибэтэ тэрийдэ.

Варвара ГАВРИЛЬЕВА.