Бөҕөстөрбүт утарсааччылара кимнээҕий?

Эрдэ суруйбуппут курдук, бэс ыйын 6-7 күннэригэр Монголияҕа, «Улан-Батор Опен-2026» диэн көҥүл тустууга норуоттар икки ардыларынааҕы, Тустуу аан дойдутааҕы холбоһугун (UWW) 3-с рейтиннээх күрэхтэһиитэ ыытыллар.

Бу улахан таһымнаах түһүлгэҕэ саха тустууга кыһатыттан Айаал Белолюбскай 57 кг, Георгий Окороков 61 кг уонна Константин Капрынов 70 кг ыйааһыннарга кытталлар.

Күрэхтэһии тосхолун быһыытынан, бээтинсэ киэһэ бары ыйааһыннарга сэрэбиэй буолла. Биһиги бөҕөстөрбүт утарсааччыларынан кимнээх буолаллара билиннэ.

57 киилэҕэ 15 бөҕөс сэрэбиэйи ааспыт. Биһиги Айаалбыт көрөргүт курдук үөһэ бөлөххө киирбит. Кини бастакы эргииргэ аан дойду былырыыҥҥы чемпиона Хан Сон Сону (Хотугу Корея) кытта киирсиэҕэ. Кореец быйыл кыһын Иван Ярыгин турнирыгар Красноярскайга, финалга тахсар иһин киирсиигэ монгол Мунх-Эрдэнэ Батхуягха очконан ыраастык хотторон, үһүс миэстэни ылбыта. Онон билигин ханнык таһымҥа сылдьара биллибэт.

Чэ, ханныгын да иһин, биһиги бэйэбит бөҕөспүтүгэр ыалдьабыт.

Бу бөлөххө өссө, бу турнирга 55 кг гректии-римнии тустууга иккис призер буолбут монгол Мунх-Эрдэнэ Даваабанди баар. Ол оннугар олохтоохтор эрэллэрэ, Ярыгин турнирын кыайыылааҕа, Азия быйылгы чемпионатын үрүҥ көмүс призера Мун-Эрдэнэ Батхуяг тоҕо эрэ кыттыбат эбит. Дьиҥэ, сайаапкаҕа баара ээ…

Ону тэҥэ үөһэ бөлөххө индус Анкуш, казах Картбай эмиэ, киирсэн баран кэлээр дьиэбит дьонноро бааллар.

Онон, үөһээҥҥи бөлөх састааба күүстээх буолбут. Оттон алларааҥҥы бөлөххө тэҥ сыһа таһымнаах бөҕөстөр түмсүбүттэр. Кинилэртэн россиянин Муса Мехтихановы бэлиэтиэххэ сөп.

61 кг ыйааһыҥҥа – 10 бөҕөс баар. Сэрэбиэй быһыытынан Георгий Окороков бастакы эргииргэ сынньанар. Иккискэ – финал чиэппэригэр кини Ессенгелди-Алмухаметов пааратын кыайыылааҕын кытта күөн көрсүө. Бу бөлөххө көрөргүт курдук, өссө индус Дипак уонна бурят Баир Баяндуев бааллар.

Биир тылынан, бу ыйааһыҥҥа киһи чорботор киһитэ суох, бары тэҥнэр. Онон бэйэбит уолбутугар күүскэ ыалдьабыт!

70 киилэҕэ 11 бөҕөс күөн көрсөр. Константин Капрынов аллараа бөлөххө киирбит. Көрөргүт курдук, кини финал 4/1-гэр Элтемиров – Батсайхан киирсиилэрин кыайыылааҕын кытта көрсүөҕэ.

Хараҕа суох сэрэбиэй бу ыйааһыҥҥа, Азия быйылгы чемпионатын финалистарын: Абхиманьюну уонна Тулганы утарыта көрүһүннэрбит. Кинилэр эмиэ биһиги Капрыновпыт бөлөҕөр бааллар.

Тус санаабар, бу ыйааһыҥҥа эмиэ күүстээхтэри биир сиргэ симпиттэр. Рейтининэн көрөн, бастыҥнары араарбатахтар быһыылаах. Сэрэйдэххэ, Капрынов иккис эргииргэ Элтемировы кытта киирсэрэ буолуо. Онно хайалара хоппута – Абхиманью/Тулга киирсиитин кыайыылааҕар тахсыаҕа.

Санатан эттэххэ, Константин Капрынов былырыын бу турнирга бастаабыта. Онон ол көрдөрүүтүн намтатыа суохтаах.

Турнир көҥүл тустууга күрэхтэһиитэ субуота күн үс ыйааһыҥҥа – 74, 86, 92 кг ыытыллар. Хапсыһыылар Дьокуускай бириэмэтинэн күнүс 11:30 чаастан саҕаланаллар. Оттон атын ыйааһыннар, ол иһигэр биһиги бөҕөстөрбүт ыйааһыннарыгар киирсиилэр өрөбүл күн буолуохтара.    

Петр ПАВЛОВ.