Антон Уваров — «Бүлүү Боотур» кыайыылааҕа!

Бэс ыйын 19-20 күннэригэр Бүлүү куорат «Оленскай» стадионугар уонна «Хомустаах» култуура уонна сиэр-туом түһүлгэтигэр «Бүлүү Боотур-2026» күрэхтэһиитэ тэрилиннэ.

Быйылгы «Бүлүү Боотур-2026» күрэхтэһиитин кыттыылаахтарынан Халбаакыттан Антон Уваров, Чинэкэттэн  Михаил Николаев, Прокопий Николаев, Тааһаҕартан-ВППК-тан Айал Никифоров, Дьөккөнтөн Харысхан Дмитриев, Бүлүүттэн Виктор Иванов, Бороҕонтон Алгыс Константинов, Лөкөчөөнтөн Ян Жирков уонна Баппааҕайыттан-Бүлүүттэн Святослав Васильев буоллулар.

Бастакы күн дэгит күрэсчиттэр оҕунан ытыыга, «Үс төгүл үс» атах оонньууларыгар, «Кыыһы сырсыыга», мас тардыһыытыгар күрэхтэспиттэригэр бастыҥ көрдөрүүнү Антон Уваров ситиспитэ, иккис үктэлгэ Михаил Николаев, үһүскэ – Прокопий Николаев тахсыбыттара.

«Хомустаах» спорт түһүлгэтигэр тэриллибит бастакы «Тутум эргиир» көрүҥэр Михаил Николаев 52 эргийэн бастаата.  Антон Уваров 48 эргийэн иккис буолла уонна балаһыанньатын өссө тупсаран биэрдэ.

Бастакы күн түмүгүнэн 4-с миэстэҕэ иһэр Лөкөчөөн эдэркээн дэгит күрэсчитэ, улууска оҕолорго бастыыр күрэхтэһии призера Ян Жирков 45 эргийэн үһүс буолла.

Хапсаҕай бастакы хапсыһыытыгар сэрэбиэй инники күөҥҥэ сылдьааччылары Антон Уваровы уонна Михаил Николаевы көрүһүннэрдэ. Антон атахха киирэн утарылаһааччытын охтордо.

Хапсаҕай финалыгар Антон Уваров уонна Харысхан Дмитриев тустууларыгар, Харысхын 2:1 ахсаанынан кыайда.

Хапсаҕай көрүҥэр Харысхан Дмитриев бастаата, иккис – Антон Уваров, үһүс – Михаил Николаев буоллулар.

«Таас көтөҕүү» көрүҥэр 110 киилэ ыйааһыннаах тааһы Михаил Николаев – 117 м, Харысхан Дмитриев – 78 м, Антон Уваров – 75 м тиэртилэр.

Сэттэ көрүҥ түмүгүнэн «Бүлүү Боотур-2026» муҥутуур кыайыылааҕынан Антон Уваров ааттанна, иккис үктэлгэ Михаил Николаев таҕыста, үһүс миэстэни Прокопий Николаев ылла.

«Бүлүү Боотур-2026» кыайыылааҕа Антон Уваров төрөөбүт күнүгэр – бэс ыйын 20 күнүгэр бэйэтигэр үчүгэй бэлэх оҥоһунна!

«Бүлүү Боотур-2026» муҥутуур кыайыылааҕар туттарыллар мотуордаах эрэһиинэ тыыны улуус биллэр 10-тан тахса урбаанньыттара кыттыһан туруордулар.

Иккис миэстэ иһин убаһаны урбаанньыт Андрей Арбыкин, үһүс миэстэ иһин автомат сааны Ил Түмэн депутата, оройуоннааҕы балыыһа кылаабынай бырааһа Егор Григорьев туруордулар.

АЭБ «Эдэр кыттааччыга», » Көрөөччү биһирэбилэ» харчынан бириистэрэ туттарылынна.

Николай КУПРИЯНОВ.

Ааптар хаартыскалара.