Үлэ коллективтара күрэхтэһэллэр: саахымат

Бэс ыйын 6-7 күннэригэр республика үлэ коллективтарын 5-с спартакиадатын саахымакка хамаанданан бастыыр иһин күрэхтэһиитэ Саахымат-дуобат киинигэр буолан ааста. Күрэхтэһээччи партияҕа оонньууругар 10 мүнүүтэ бэрилиннэ уонна хас хаамыытын аайы 5 сөкүүндэ эбилиннэ.

Барыта 16 профсоюзтар хамаандалара швейцарскай системанан тоҕус тур оонньоото. Хамаанда аайы иккилии эр киһи уонна иккилии дьахтар кытынна.

Кыайыылааҕынан Үөрэхтээһин тэрилтэлэрин профсоюһун хамаандата (Михайлов Семен, Местников Семен, Эверстова Галина, Жиркова Туйаара) 31 очукуону хомуйан буолла, биэс эрэ очукуону бэристилэр. Хамаанда бары утарсааччыларын кыайталаата, бүтэһик турдар иннилэригэр бастыыра биллибитэ. Хамаанда бары чилиэннэрэ дуоскаларыгар бириистээх миэстэлэргэ тигистилэр.

Иккис миэстэни икки хотторуулаах, биир тэҥнэһиилээх Доруобуйа харыстабылын профсоюһун хамаандата (Хомподоев Афанасий, Филиппов Владимир, Кириллина Александра,  Андросова Татьяна) 24,5 очукуону хомуйан ылла. Төһүү күүһүнэн төрдүс дуоска оонньооччута буолла, атыттар наадалаах очукуолары хомуйдулар.

Үһүс миэстэҕэ икки тэҥнэһиилээх, биир хотторуулаах Олоҕу хааччыйыы профсоюһун хамаандата (Александров Георгий, Цыпандин Павел, Стручкова Сардана, Серкина Анна) 23,5 очукуолаах тигистэ. Төрдүс дуоска оонньоочута хамаанданы иккис миэстэттэн матарда.

Икки чемпионнаах Минспорт хамаандатын дьахталлар мөлтөөн биэрэннэр, бириистээх миэстэҕэ тиксиһиннэрбэтилэр, төрдүс миэстэ буоллулар.

Бастакы дуоскаҕа  8,5 очукуолаах Капитонов Николай (Минспорт) чемпион буолла, иккис миэстэни Михайлов Сэмэн 8 очукуону хомуйбут ылла. Киниттэн очукуо аҥараа хаалан Александров Георгий 7,5 очукуону ылан үһүс миэстэҕэ таҕыста.

Иккис дуоскаҕа 8 очукуолаах Мустафин Нариман чемпион буолла, иккис миэстэни Култаев Нурланбек 7,5 очукуолаах ылыыта соһуччу буолла. Үһүс миэстэҕэ 7 очукуоламмыт Местников Сэмэн  таҕыстыта.

Үһүс дуоскаҕа республика экс-чемпионката Эверстова Галина бары утарсааччыларын хотон эрэллээхтик бастаата. Иккис миэстэни 8 очукуону хомуйбут Алексеева Матрена (Наука) ылла, киниэхэ коэффиенынан хотторбут Стручкова Сардана үһүс буолла.

Төрдүс дуоскаҕа республика экс-чемпионката Андросова Татьяна бары утарсааччыларын кыайан холкутук бастаата. Иккис миэстэни Захарова Галина (Авиация) 7,5 очукуону хомуйан ылла, үһүс миэстэҕэ Жиркова Туйаара 7 очукуоланан тигистэ.

Кыайыылаах хамаандаларга кубоктары уонна грамоталары, хамаанда кыттааччыларыгар мэтээллэри, грамоталары республика профсоюзтарын салайааччыта Дегтярев Н.Н. туттарда. Дуоскаларынан миэстэлэспиттэр мэтээллэри уонна грамоталары саахымат федерациятын толорооччу дириэктэрэ Гаврильев В.А. илиититтэн ыллылар.

Петр ЯКОВЛЕВ, күрэхтэһии судьуйата