Виктор Яковлев – Россия кыайыылааҕа

Чечня Республикатын киинигэр Грознай куоракка 24-гэр диэри саастаахтарга Россия көҥүл тустууга күрэхтэһиитэ түмүктэннэ. Тустуу сыллааҕы халандаарыгар бу күрэхтэһии – дойду хамаандатын сүүмэрдээһиҥҥэ биир сүрүн тургутуунан буолла. Кыайыылаахтар аны күһүн АХШ Лас-Вегас куоратыгар буолар аан дойду түһүлгэтигэр кыттыахтаахтар.

Саха сириттэн бу саастаахтарга сүүрбэ бөҕөһү тренердэр Вадим Семенов, Прокопий Петров салайан илдьэ сырыттылар.

Күрэхтэһии бүтэһик күнүгэр 61 киилэҕэ Виктор Яковлев быһаарыылаах хапсыһыыга олохтоохтор эрэллэрэ Усман Индирбаевы 5:2 ахсаанынан кыайда. Манна, тустуу бүтэрэ аҕыйах сөкүүндэ хаалыар диэри Индирбаев 2:1 хотон испитэ. Онтон биһиги уолбут бүтэһик санаатын, күүһүн хомунан, киһитин кууһан ылан халбарыйан быраҕан 4 баалы ылла. Онон түмүккэ кыл мүччү кэриэтэ 5:2 кыайан таҕыста.

PS: Виктор Яковлев — Усман Индирбаев тустууларын уонна атын хапсыһыылары видеотын «Дьулурҕан» хаһыат телеграмҥа каналыгар t.me/dzulurgan көрүөххүтүн сөп.

Манна даҕатан эттэххэ, Виктор Яковлев финалга диэри С.Манаповы (Ленинград уобалаһа) 6:0, С.Ооржагы (Тыва) +2:2, Никита Лежияны (Калининград) 5:0, Магомедсаид Османовы (Дагестан) 2:1 ахсааннарынан кыайталаата.

Быйылгы сылга үктэнэн баран, Россия улахан дьоҥҥо призёра Виктор Яковлев киһини үөрдэр эриэ-дэхси көрдөрүүнү ситиһэр. Ол курдук, албан аатырбыт А.Медведь кэриэһигэр норуоттар икки ардыларынааҕы турнирга үһүс, Н.Н. Тарскай бирииһигэр Саха сирин чемпионатыгар бастакы, студеннарга Россия чемпионатыгар – үһүс миэстэлэри ылаттаабыта. Аны эдэрдэргэ Россия кыайыылааҕа буолла.

Түгэнинэн туһанан, кыайыылаах Виктор Яковлевы уонна кини тус тренерэ – Саха сирин үтүөлээх тренерэ Николай Николаевич Рожины уонна тренердэр састааптарын эҕэрдэлиибит! Өссө үрдүк ситиһиилэри баҕарабыт! Санатан эттэххэ, күрэхтэһии балаһыанньатын быһыытынан кыайыылаахха 100, кини тренеригэр 50 тыһ. солк. харчынан бириис туттарылынна.

Буолан ааспыт күрэхтэһиигэ биһиги республикабыт хамаандата үчүгэй ситиһиилэннэ. Виктор Яковлев 61 киилэҕэ кыһыл көмүс, Лев Павлов 57 киилэҕэ боруонса, Василий Григорьев 65 киилэҕэ боруонса мэтээллэри ыллылар. Бу ситиһиилэринэн саха эдэр бөҕөстөрө бэйэлэрин биир дойдулаахтарын үөртүлэр, киэн туттуу санаатын үөскэттилэр.

Бу ситиһиилэринэн уолаттарбыт эдэрдэргэ Россия сүүмэрдэммит хамаандатын састаабыгар киирдилэр уонна анал үөрэтэр-эрчийэр түмсүүга ыҥырыллыахтара. Аны, аан дойду түһүлгэтигэр ким барарын – сайын Москваҕа ыытыллар улахан дьоҥҥо Россия чемпионатын түмүгэ быһаарыаҕа.

Петр ПАВЛОВ.