Уоскутар бөлөххө үс уолбут тустуоҕа

Чечня киин куоратыгар Грознайга, 24-гэр диэри саастаахтарга көҥүл тустууга Россия күрэхтэһиитэ ыытылла турар. Бастакы күн түмүгүнэн 57, 65, 70, 74, 79 уонна 97 кг ыйааһыннарга кыһыл көмүс мэтээл иһин кимнээх киирсэллэрэ быһаарылынна.

Бу түһүлгэҕэ ордук эрэммит бөҕөспүт Лев Павлов (57 кг) – утуу-субуу Шобосоевы (Бурятия) 10:0, Азаматовы (Москва) 8:0 ахсааннарынан итэҕэтиилээхтик кыайан баран, финал чиэппэригэр олохтоохтор эрэллэрэ – 21-гэр диэри саастаахтарга Россия уонна аан дойду күрэхтэһиилэрин кыайыылааҕа Магомед-Салях Оздемировка мөккүөрдээх киирсиигэ хотторуулааҕынан ааҕылынна. Салгыы киирсиигэ Оздемиров утарсааччытын кыайан финалга таҕыста.

Онон Лев “санааны уоскутар” бөлөххө киирдэ. Онно кини Шахбанов (Дагестан) – Шагдуров (Бурятия) кыайыылааҕын кытта киирсиэҕэ. Ити тустууга хайалара кыайбыт – түһүлгэ боруонса мэтээлин иһин Тунджай Вердиевка (Оренбург) тахсыаҕа.

Ити курдук, бастакы күн түмүгүнэн Саха сирин хамаандатыттан өссө Василий Григорьев (65 кг) уонна Василий Винокуров (74 кг) – “санааны уоскутар” бөлөххө тустуохтара. Григорьев – У.Магомедовы (Астрахань), оттон Винокуров – В.Боргояковы (Хакасия) кытта киирсиэхтэрэ.

Атын уолаттарбытыттан Игорь Матвеев (70 кг), Владимир Бояновскай уонна Иннокентий Бабаранов (иккиэн 74 кг) үстүү эргиир туһуннулар.

Бүгүн күрэхтэһиини – 61, 86, 92, 125 кг ыйааһыннаахтар саҕалыыллар. Онуоха биһиги болҕомтобутун Артём Слепцовка, Дамир Явловскайга, Виктор Яковлевка уонна Уйгун Степановка уурабыт.

Бүгүҥҥү финаллар:

57 кг Магомед Сайпудинов (Дагестан) — Магомед-Салях Оздамиров (Чечня)

65 кг Адам Архиев (Чечня) — Эльдар Ахмадудинов (Дагестан)

70 кг Магомед-Эми Эльтемиров (Чечня) — Рустам Долаев (Карачаево-Черкессия)

74 кг Магомед Байтукаев (Чечня) — Тамир Ешинимаев (Бурятия)

79 кг Маламагомед Гамзатов (Дагестан) — Абдурахман Абдусаламов (Дагестан)

97 кг Магомедгаджи Магомедов (Дагестан) — Мустафагаджи Малачдибиров (Дагестан)

Бүгүн күрэхтэһии эмиэ, Дьокуускай бириэмэтинэн 17:00 чаастан саҕаланар, 23:00 – түһүлгэни үөрүүлээхтик аһыы, 23:30 чаастан – 57, 65, 70, 74, 79, 97 кг ыйааһыннарга быһаарыылаах хапсыһыылар, оттон 02:00 – 61, 86, 92, 125 кг финалга тахсар иһин киирсиилэр.

PS: Күрэхтэһии ыйааһыннарынан сеткаларын, кэккэ видеолары, суһал сонуннары «Дьулурҕан» телеграмҥа каналыгар — t.me/dzulurgan көрүөххүтүн сөп.

Петр ПАВЛОВ.