«Уйбаан Ушницкай эйгэтэ»

Итинник ааттаах быыстапка бүгүн Бэчээт дьиэтигэр баар Суруналыыстар түмэллэригэр үөрүүлээхтик аһылынна. Бу тэрээһин биллиилээх суруналыыс, суруйааччы, общественнай-политическай деятель Иван Петрович Ушницкай төрөөбүт күнүгэр – ыам ыйын 5 күнүгэр, олоҕун анаабыт бэчээтин, Сэбиэскэй бэчээтин күнүгэр сөп түбэһиннэрэн ыытыллыбыта кэрэхсэбиллээх. Баара эбитэ буоллар, Уйбаан бу күн үбүлүөйдээх 65 сааһын туолуо этэ…

Быыстапкаҕа Иван Петрович олоҕун көрдөрөр хаартыскалар, наҕараадалара, докумуоннара, араас тэрээһиннэртэн сувенирдара, докумуоннара, тутта сылдьыбыт маллара, коллекция быһыытынан муспут уруучукалара уонна значоктара көрдөрүүгэ туруорулуннулар.

Бэлиэ күҥҥэ Иван Ушницкай чугас дьоно-сэргэтэ, үөлээннээхтэрэ, биир идэлээхтэрэ суруналыыстар, устудьуоннар, кини талааныгар сүгүрүйээччилэр муһуннулар.

Быыстапканы аһыыга биллиилээх театральнай режиссер Андрей Борисов, Саха сирин физическэй култуураҕа уонна спорка миниистирин бастакы солбуйааччы Гаврил Мохначевскай, «Саха Бэчээт» тэрилтэ генеральнай дириэктэрэ Ньургуйаана Стручкова, Саха сирин Суруналыыстарын сойууһун салайааччытын солбуйааччы Галина Бочкарева, Хотугулуу-Илиҥҥи федеральнай университет доцена Олег Сидоров, И.П. Ушницкай бииргэ төрөөбүт убайа – дуобакка гроссмейстер Петр Ушницкай, уо.д.а. эҕэрдэ ахтыыларыгар, Иван Ушницкай киэҥ эйгэлээх суруналыыс буоларын, ону тэҥэ депутат быһыытынан общественнай олоххо көхтөөхтүк кыттыбытын, айылҕаттан айдарыылааҕын, номоххо киирбитин, аата өссө даҕаны үйэтитиллэ турарын эттилэр.

Холобур, Арассыыйа үтүөлээх артыыһа Андрей Борисов: «Ньургуһун таҕыста да, Уйбааммытын саныы туруохпут, саас аайы кини аата куруук тылла, тиллэ туруоҕа», — диэн этиитэ наһаа үчүгэйдик, кырдьык да чугастык саныыр киһибитин өрүү үтүөтүк саныы турарбытыгар ис киирбэхтик иһилиннэ.

Суруналыыстар түмэллэрэ биир үтүө үгэстээх, ол – түөрт уонча сыл бэчээт эйгэтигэр бэриниилээхтик үлэлээбит дьон ааттарын үйэтитиигэ, кинилэр «кыһыл көмүс уруучукаларын» сэдэх, күндү экспонат быһыытынан түмэн туруоруу буолар. Бэлиэ күҥҥэ, И.П. Ушницкай кыыһа Саргылана Ивановна аҕатын уруучукатын түмэлгэ үйэ-саас тухары көрдөрүүгэ туттарда.

Итиэннэ биир кэрэхсэбиллээх түгэнинэн, В.В. Никифоров – Күлүмнүүр атынан судаарыстыбаннай бириэмийэ лауреата, Саха сирин үтүөлээх суруналыыһа, Уус Алдан улууһун бочуоттаах гражданина Иван Петрович Ушницкай мэтириэтин «Номоххо киирбит суруналыыстар» кэккэлэригэр киллэрии сиэрэ-туома ыытылынна. Ол курдук, күндү киһибит сэбэрэтэ – биллиилээх спортивнай суруналыыс, комментатор Вячеслав Гаврильевич Степанов мэтириэтин кытта сэргэстэһэ туруоруллубута, үтүө өйдөбүнньүк быһыытынан сыаналанар.

Ити курдук, бу кыһын биһиги кэккэбититтэн туораабыт Иван Петрович Ушницкай үтүө аата үйэтитиллэр. Аны, кини суруйан хаалларбыт кинигэлэрин бэчээттээн таһаарыы, бэйэтэ олохтообут Ньургуһунун күнүн тэрийэн ыытыы о.д.а. тэрээһиннэр күүтүллэллэр.

Маннык быыстапканы Саха сирин Суруналыыстарын сойууһа тиһигин быспакка тэрийэн ыытара хайҕаллаах дии саныыбын. Быыстапка ыам ыйын устата көрдөрүүгэ туруоҕа…

Петр ПАВЛОВ.

Ааптар хаартыскалара.