Тургутуу викторината биһирэннэ

Аан дойду түмэллэрин күнүн көрсө Р.М. Дмитриев аатынан Олимпийскай эрэл үөрэҕин кыһатын үлэһиттэрин ортолоругар, училищебыт төрүттэммитэ 35 сылыгар, ону таһынан олимпийскай чемпион Роман Дмитриев олоҕун, спортивнай итиэннэ судаарыстыбаннай үлэтин туһунан аналлаах викторина ыытылынна.

Бу маннык викториналары икки түһүмэхтээн үөрэнэр оҕолорбутугар анаан эмиэ ыыта сылдьыбыппыт. Сүрүннээн бу сырыыга 72 ыйытык-хоруй бэлэмин училище спорка Албан аатын түмэлин салайааччыта, тустууга ССРС спордун маастара, Саха Республикатын физкултуураҕа уонна спорка үтүөлээх үлэһитэ, норуоттар икки ардыларынааҕы категориялаах судьуйа, Россия физкултуураҕа уонна спорка туйгуна Николай Николаевич Константинов оҥорон, училищебыт олоҕор саҥа сүүрээни киллэрдэ.

Училещабыт үлэһиттэрин ортолоругар маннык тургутуу тэрээһинэ ыытылла илик буолан интириэһи үөскэттэ. Ол курдук, училище араас салаатын үлэһиттэрэ хамаанда тэринэн, тус-туспа ааттанан-суолланан көхтөөхтүк кытыннылар. Хапсыһыы киирсиилэригэр ыйытыкка хоруйдара олус спортивнай күүрээннээхтик уонна тыҥааһыннаахтык аастылар. Училищебыт сайдыытын уонна Р.М. Дмитриев тус олоҕун, үлэтин тустарынан билэ сатааһын, ол быыһыгар бары кыттааччылар, «ыалдьаачылар даҕаны билбэтэхтэрин видеопроектор экранын нөҥүө истэн-көрөн билиилэрин кэҥэттилэр.

Манна даҕатан, тургутуу аһыллыытыгар Кустуктуров Василий Васильевич диэн кинооператор урут, 1969 сыллаахтан саҕалаан Р.М. Дмитриев туһунан уһулбут хроникальнай киинэтин быстахтык көрдөрүү буолла. Ону таһынан училищебыт 2012 с. оҥоһуллубут историческэй видеоролигы сөргүтэн ахтыы көрүүтэ оҥоһулунна. Дьүүллүүр сүбэҕэ Константинов Н.Н., иитэр үлэ салайааччыта Александр Владимирович Матвеев, учууталлар, республика үөрэҕириитин туйгуннара Егор Тимофеевич Егоров,  Римма Алексеевна Адамова кыайыылаахтары быһаардылар. Тэрээһини оҥорууга училище иитиигэ уонна үөрэххэ  үлэтин дириэктэри солбуйааччыта Петр Юрьевич Протодьяконов кыһамньылаахтык көҕүлээн сыһыаннаста.

Викторина түмүгүнэн ордук үчүгэй бэлэмнээх училище спортивнай салаатын тренэрдэрин «Триумф» диэн аатаммыт хамаандата кыахтаахтык бастаата. Кинилэргэ тустууга СР үтүөлээх тренэрэ, спорт маастара Гаврил Игнатьев, Россия эдэрдэргэ үс төгүллээх, аан дойду байыаннайдарын ортолоругар кыайыылааҕа Павел Капитонов, боксаҕа Россия уолаттарга призера, спорт маастара Андрей Слепцов (бары училище выпускниктара), тустууга норуоттар икки ардыларыннааҕы кылаастаах маастар Александр Птицын киирбиттэр.

Иккис үрдэл өрөгөйүн, олох кыра баалынан чорбойон, тэрийэр уонна иитэр үлэ салаатын үлэһиттэрин «ОЭУ» хамаандата (Татарникова Г.А., Сивцева В.П., Прокопьева Ю.Б.) таҕыста. Үһүс кирбии өрөгөйүн хаһаайыстыбаннай уонна эмтиир-томтуур салаатын үлэһиттэрин «Победитель» диэн ааттаммыт хамаандата (Иванова В.П., Дмитриев Г.Н., Неустроев В.И., Неустроева Л.С.) кыттааччылара биллилэр, үөрүү-көтүү доҕуһуолланнылар. Төрдүс бириистээх миэстэҕэ үөрэх салаатын «Олимпионик» хамаандата тигистэ.

Бары кыттааччылар администрация туруорбут (дириэктэр Чердонов С.С.) бэртээхэй бириистэринэн наҕараадаланнылар. Училище профкомун уонна Константинов Н.Н. бэйэтэ туруорбут анал бириистэринэн, ойуччу хоруйдаабыт үлэһиттэрбит: Игнатьев Г.С., Капитонов П.М., Татарникова Г.А.,  Пермякова Т.Д., Иванова В.П., Неустроев В.И., Сивцева В.П. наҕараадаланнылар. Училище библиотекара Сивцева А.К. туспа бирииһинэн бэлиэтэннэ.

Бу тургутуу-викторина биир кэрэ бэлиэтинэн, Москваттан России спордун министиэристибэтин эппиэттээх үлэһитэ, Россия үрдүнэн ыытыллар физкултуураҕа уонна спорка саҥа оҥоһуллар бырайыактарын салайааччыта Степанов Игорь Владимирович кэлэ сылдьыыта буолла.

Кини училищебыт түмэлигэр сылдьан уонна викторинаны бэйэтинэн көрөн-истэн баран биһирэбилин тиэртэ. Маннык тэрээһиннэри интириэһиргээтэ, быстыбакка ыытарбыт туһунан санаатын  үллэһиннэ. Онон үлэһиттэр ортолоругар ыытыллыбыт тургутутуу-викторина сыалын сиппитинэн аахтыбыт. Үлэһиттэр маннык тэрээһин ыытыллыбытынан махталларын эттилэр. Аныгы да сырыыларга маннык тургутуу-викториналары ыытыы оҕолорго уонна үлэһиттэргэ даҕаны үөрэтии кэскиллээҕин көрдөрдө. Үөрэхпит кыһатын иһинэн тэриллибит спорка Албан аат түмэлэ, уопсай үлэбитигэр сабыдыала чэчигирии, эбиллэ, сайда туруохтун!

Александр МАТВЕЕВ, училище иитии үлэтин уонна профкомун салайааччыта.