Спорка Албан аат түмэлин тэрээһинэ

Соторутааҕыта, олимпийскай чемпион Р.М. Дмитриев аатын сүгэр республикатааҕы Олимпийскай эрэл училищетын үөрэнээччилэрин, студеннарын ортолоругар икки түһүмэхтэн турар түһүлгэлээх викторина ыытыллан ааста. 

Бастакы түһүмэх училищебыт тэриллибитэ 35 сылыгар «УОР-35» диэн ааттанна. Училище сайдыытын устуоруйатын, оҕолорбут спортивнай уонна үлэһиттэрин ситиһиилэрин туһунан суолталаах ыйытыктар киирбиттэрэ.

Иккис түһүмэх, атын күҥҥэ Роман Михайлович Дмитриев олимпийскай оонньуулары 1972, 1976 сылларга өрөгөйдөөх кыайыытын, кини олоҕун-дьаһаҕын, спортивнай ситиһиилэрин, судаарыстыбаннай, общественнай үлэтин туһунан тустаах ыйытыктар оҥоһуллубуттара.

Викторина сыала-соруга: Республикабытыгар култуура уонна Российскай Федерацияҕа  сомоҕолоһуу сыла биллэриллибитинэн, эдэр көлүөнэ училищебыт үлэтин-хамнаһын, ситиһиилэрин, Роман Михайлович туһунан олорбут олоҕун туһунан билии, сырдатыы, дойдуга бэриниилээх буолуу тыыныгар иитии буолар.

Викториналар буолуон иннилэринэ училищебыт спортивнай Албан аат түмэлин төрүттээччитэ уонна салайааччыта көҥүл тустууга ССРС спордун маастара, Саха АССР үтүөлээх тренэрэ, Саха Республикатын физкултуураҕа уонна спорка үтүөлээх үлэһитэ, Николай Николаевич Константинов оҕолор ортолоругар элбэх экскурсиялары, аһаҕас уруоктары оҥортоото, билиилэрин кэҥэттэ.

Викториналар 52-лии ыйытыктарын уонна ол хоруйдарын Николай Николаевич эрдэттэн бэйэтэ бэлэмнээбитэ. Викториналар «Своя игра» диэн  форматынан видеопроектарынан көрдөрүллэн ыытылыннылар. Хас биирдии курстан биэстии кыттааччы талыллан, туспа ааттанан-суолланан кытыннылар, билиилэрин көрдөрдүлэр. Хоруйдары жюри сыаналаата. Ол курдук, дьүүллүүр сүбэ: Константинов Н.Н., училище иитэр үлэ салаатын салайааччыта Матвеев Александр Владимирович, история учуутала, Саха Республикатын үөрэҕириитин туйгуна Егоров Егор Тимофеевич кыайыылаахтары быһаардылар. Спортивнай эйгэ үөрэҕин кыһата буолан, оҕолор викторинаҕа киирсиилэрэ бэрт тыҥааһыннаахтык барда. Тэрээһин аһыллыытыгар, Р.М. Дмитриевкэ анаммыт саҥа ырыа дуораһыйда, баҕа санаалар этилиннилэр.

Бастакы уонна иккис түһүмэх түмүктэринэн ордук бэлэмнээх 1 курс, (1 группа) студеннара эрэллээхтик бастаатылар. Хамаанда хапытаана Гадоев Ибрагим эбиитин  «Знаток викторины» диэн номинацияҕа, ааптар Н.Н. Константинов «Тустуук ис туругун бөҕөргөтүү» диэн кинигэтин анал бирииһинэн наҕараадаланна.

Иккис үрдэлгэ 2 курс, (1 группа), үһүс үрдэлгэ 3 курс, (1 группа) хамаандалара таҕыстылар.

Онтон атын күҥҥэ ыытыллыбыт викторина иккис түһүмэҕэр  «Р.М. Дмитриев кыайыыларын өрөгөйө» диэн салааҕа эмиэ 1 курс, (1 группа) кыайыы үрдэлин иккиһин биллэ. Ол курдук, бу хамаанда чилиэнэ Максим  Андросов «Знаток викторины» анал  бирииһинэн «Аан дойду чемпиона» диэн Р.М. Дмитриев туһунан Иван Кычкин суруйбут кинигэтинэн бириис тутта. Бу курс куратора Пермякова Татьяна Дмитриевна оҕолорун викториналарга кыһамньылаахтык бэлэмнээбитэ бэлиэтэннэ. Тустааҕынан иккис миэстэҕэ 2 курс (2 группа), үһүскэ 2 курс (1 группа) студеннара таҕыстылар.

Бириистэри  училищеҕа үөрэнэр оҕолор  төрөппүттэрэ туруорбуттарын иһин махталбытын тиэрдэбит.

Маннык викториналар үөрэнэр оҕолорбутугар училище олоҕун, олимпийскай чемпион Р.М. Дмитриев туһунан, бүтэрбит выпускниктарбыт спорка уонна үлэҕэ ситиһиилэрин, коллектив үлэһиттэрин тустарынан эргиччи киэҥ билиилээх буолан тахсалларыгар эбии билии, төһүү күүс буолара саарбаҕа суох. Инникитин маннык викториналары оҕолорго  эрэ буолбакка, училищебыт  үлэлиир коллективыгар туспа оҥорорго сүбэлэстибит.

Түгэнинэн туһанан республика спортивнай үлэһиттэрин, ветераннарын, күрэсчиттэри, үөрэх кыһаларын, нэһилиэнньэни, Р.М. Дмитриев аатынан училищебыт спортивнай Албан аат түмэлигэр (Жорницкай уулусса, 13) кэлэн көрөн, билсэн, билиигитин кэҥэтэн бараргытыгар ыҥырабыт.

Манна даҕатан, Роман Михайлович Дмитриев туһунан фото-видео матырыйааллардаах, эспонаттардаах уонна суруллубатах ахтыылардаах буоллаххытына бука диэн түмэл салайааччытыгар Н.Н. Константиновка (89644208026 тел.) билсэн, түмэлбит экспонаттарын байытан кыттыһаргытыгар көрдөһөбүт!

Александр МАТВЕЕВ, Р.М. Дмитриев аатынан ОЭУ иитэр үлэҕэ салайааччыта.