Оҕолорго киин куорат чемпионата

Муус устар 28-29 күннэригэр киин куорат оҕолорго чемпионата 7 турдаах (30+30) ыытылынна. Барыта 84 оҕо саастарынан алта бөлөхтөрүнэн арахсан кытынна.

Аччыгый бөлөххө 2019 сылтан аллараа төрөөбүттэргэ тоҕус эрэ оҕо кытынна, Саша Алексеев (“Улыбка” уһуйаана) барыларын хотон холкутук бастаата, 5 очукуону хомуйбут Данил Алексеев (детсад-23) иккис буолла, үhүс миэстэни 4 очукуолаах Миша Яровенко (“Академия детства” ) ылла. Кыргыттарга 4 очукуолаах Айсаара Павлова (детсад-89) чемпионка буолла, коэффициенынан хотторбут Амелия Барашкова (“Искорка”) иккис буолла. Үһүс миэстэни Мирослава Сидорова (“Остров сокровищ”) ылла.

11 саастаахтар бөлөхтөрүгэр 32 оҕо  кытынна. Чемпион аатын алта очукуолаах Сережа Ксенофонтов ылла, коэффициенынан хотторбут Арсений Абрамов (СОШ-1) иккис буолла, үhүс миэстэҕэ Коля Находкин (СОШ-39) икки утарсааччытын коэффициенынан баһыйан тигистэ. Кыргыттарга биэс очукуолаах Каролина Готовцева (ЯГНГ) бастаата, коэффициенан хотторбут Кира Гуляева (ДДТ) иккис буолла, үһүс миэстэни кинилэртэн очукуо аҥаара хаалан Саша Марданова (СОШ-9) ылла.

13 саастаахтар бөлөхтөрүгэр 20 оҕо кытынна. Биирдэ эрэ тэҥнэспит Ваня Федоров (СОШ-26) чемпион аатын холкутук ылла. Биир тэҥнэһиилээх уонна чемпиоҥҥа хотторбут Тимур Яковлев (ЯГНГ) иккис буолла. Түөрт аҥаар очукуолаах Афоня Мексяров (СОШ-31) икки утарсааччыларын коэффициенынан баһыйан үһүс миэстэҕэ тигистэ. Кыргыттарга Алиса Харлампьева (СОШ-2) биэс очукуону хомуйан бастаата, очукуо аҥаарынан хаалбыт Диана Владимирова (ЯГНГ) иккис буолла.Түөрт очукуолаах Вика Марданова (СОШ-9) үһүс буолла.

15 саастаахтар бөлөхтөрүгэр 12 оҕо кытынна. Очукуо аҥаара эрэ бэрсибит Сеня Григорьев (СОШ-9) чемпион аатын холкутук ылла. Иккис миэстэҕэ киниттэн биир очукуонан хаалан Рома Андриевскай (СОШ-21) таҕыста. Үһүс миэстэҕэ түөрт очукуолаах үс утарсааччытын коэффициенынан баһыйан Ньургун Соловьев (ЦГО) тигистэ. Кыргыттарга соҕотох кыттааччы түөрт очукуолаах Алена Румянцева (СОШ-2) чемпионка буолла.

Улахан саастаахтар бөлөхтөрүгэр 10 оҕо кытынна. Россия кыргыттарга чемпионката Валерия Слепцова барыларын кыайан киин куорат чемпионкатынан холкутук буолла. Уолаттарга Дима Саввинов (“Сахат” оскуола) түөрт аҥаар очукуолаах  бастаата, очукуо аҥаарынан хаалбыт Миша Слепцов иккис буолла, үһүс миэстэни үс аҥаар очукуолаах Володя Архипов (СОШ-26), Байдам Прядезниковы (СОШ-39) коэффициенынан баһыйан ылла. Кыргыттарга иккис миэстэҕэ  Айаана Винокурова (СОШ-15) тигистэ. 19 саастаахтарга Алина Матвеева (СОШ-15) соҕотох кыттааччы чемпионка буолла.

Эдэр саахыматчыттар бириэмэлэрин ситэ туһаммакка, мөлтөх хаачыстыбалаахтык оонньууллара уонна сорохтор хотторуулаах позицияларга өсөһөн олоро сатыыллара көһүннэ итиэннэ кыра уонна улахан саастаахтар икки бөлөхтөрүгэр кыттааччы ахсаана быстар мөлтөҕө бэлиэтэннэ.

Петр ЯКОВЛЕВ, күрэхтэһии судьуйата