Николай Николаевич Тарскайга сүгүрүйүү

Бүгүн, ыам ыйын 8 күнүгэр – Саха сиригэр физическэй култуура уонна спорт хамсааһынын көҕүлээччи, ССРС физическэй култуураҕа туйгуна, биллиилээх государственнай уонна общественнай деятель Николай Николаевич Тарскай төрөөбүт күнүгэр, кини бэйэтин аатын сүгэр «Туймаада» стадион таһыгар баар бюһугар, үгэс быһыытынан, сибэкки дьөрбөтүн ууруу сиэрэ-туома ыытылынна.

Бэлиэ күҥҥэ ытыктабыл уонна сүгүрүйүү бэлиэтин көрдөрөн республика салалтата, спорка үлэһиттэрэ, Н.Н. Тарскай (1924-1962) биир дойдулаахтара, Саха сирин спорка общественноһа, куорат олохтоохторо, студеннар, үөрэнээччилэр муһуннулар.

Буоларын курдук, саха спордун аҕатынан билиниллибит киһи туһунан ахтан-санаан аһыы, кини ыйбыт суолунан салгыы эрдээхтик үлэлээн-хамсаан иһэргэ, аата үйэ-саас тухары ахтылла турарыгар этиилэр оҥоһулуннулар.

Ол курдук, Саха Республикатын Правительствотын председателин солбуйааччы Сергей Местников, Уус Алдан улууһун баһылыгын солбуйааччы Григорий Аргунов, Н.Н. Тарскай сиэнэ Людмила Кулагина, кэлбит дьону буолаары турар Улуу Кыайыы 81 сыллаах бэлиэ күнүнэн эҕэрдэлээн туран, саха биир чулуу киһитэ Николай Николаевич Тарскай аата бу курдук үйэтитиллэ турарыгар баҕардылар.

Тэрээһиҥҥэ СР физическэй култуураҕа уонна спорка министирин бастакы солбуйааччы Гаврил Мохначевскай, Олимпиада-76 үрүҥ көмүс призера Александр Иванов, Ил Түмэн депутата Геннадий Васильев, Уус Алдан түмсүүтүн салайааччы Алексей Троев, СР уонна РФ физическэй култуураҕа уонна спорка үтүөлээх үлэһитэ Прокопий Готовцев, спорт түмэллэрин салайааччы Михаил Друзьянов, уо.д.а. кыттыыны ылллар.

Биллэрин курдук быйыл – Саха сирин тустуутун уонна боксатын 70, аатырбыт олимпиецтарбыт Монреаллааҕы Олимпиадаҕа өрөгөйдөрүн 50 сыллаах үбүлүөйдээх сыллара. Бу бэлиэ түгэннэр Н.Н. Тарскайы кытта быһаччы ситимнээхтэр. Ити кини ылыммыт сыалын-соругун ситиһиитин, өтө көрүүтүн туолуутун быһыытынан үрдүктүк сыаналанар.

Петр ПАВЛОВ.

Ааптар хаартыскалара.