Нэһилиэнньэ ханнык кэрдиискэ сылдьарын – ГТО нуормалара көрдөрөллөр

Ленскэй нэһилиэк тэрилтэлэрэ “Эҥсиэли” стадиоҥҥа биэс көрүҥҥэ ГТО нуормаларын туттардылар. Бүгүҥҥү ГТО туттарыыга тус бэйэ туһугар муҥутуур кыайыылааҕынан Намнааҕы педагогическай колледжтан Юрий Эверстов ааттанна.

1000 м сүүрүү, пресс хачайдааһын, эр дьоҥҥо тардыныы эбэтэр 16 кг гиирэни өрө көтөҕүү, дьахталларга намыһах туора мастан тардыныы, ыскамыайкаттан туран имигэс буолууну билии (гибкость), лазернай винтовканан ытыы түһүмэхтэртэн турар ГТО фестиваль муҥутуур кыайыылааҕынан Нам улууһа киэн туттар, убаастыыр, холобур оҥостор спортсмеммыт Юрий Эверстов ааттаммытыттан бары да үөрдүбүт! “Дыгын оонньууларын” кыайыылааҕа Юрий Афанасьевич эдэр эрдэҕиттэн спорду өрө тутар, күн бүгүҥҥү диэри спорду эдэр көлүөнэҕэ тарҕатар.

Оттон 1-кы бөлөххө киирэр тэрилтэлэргэ, улуус дьаһалтата кыайыылааҕынан ааттанна. Иккис миэстэ – Намнааҕы педагоическай колледж уонна үһүс миэстэ – Намнааҕы үһүс нүөмэрдээх оскуола. Миэстэлэри Намнааҕы 2-с нүөмэрдээх уонна “Сулусчаан” уһуйаан салгыыллар. Биир да күрэхтэһиини көтүппэккэ иһэр бу ааттаммыт оҕо тэрилтэлэрэ оскуолаларга уонна уһуйааннарга өссө төгүл холобур буолалларын чорботобун.

Иккис бөлөххө, аата да этэрин курдук, эрэллээх кыайыыны Олимпийскай эрэл спорт оскуолата ылла. Иккис миэстэ – Намнааҕы социальнай харалта уонна үһүс миэстэ – Намнааҕы ойуур хаһаайыстыбатын үлэһиттэрэ тахсаллар.

Дьоҕус тэрилтэлэргэ биир да эр киһитэ суох күрэхтэһэр Намнааҕы социальнай харалта тэрилтэтэ бу да сырыыга икки хамаанданы туруорда. Итинник күрэхтэһэн-күрэхтэһэн, ньоҕойдоһон бүгүн кинилэр үрүҥ көмүс мэтээллэри кэтэри ситиспиттэрин үөрэн туран иһитиннэрэбит.

Харысхан ПОПОВ.

Нам.