Кыайыы күнүн көрсө…

Аҕа дойду Улуу сэриитигэр Кыайыы 81-с сылыгар анаммыт «Кыайыы уота» кэриэстэбил сүүрүү бэҕэһээ Нам улууһун нэһилиэктэринэн ыытылынна.

Дьокуускайга, Кыайыы болуоссатыттан саҕыллыбыт уоту Ил Түмэн депутата, Олимпиада-2008 боруонса призера Георгий Балакшин, СР Коммунистарын партиятын салайааччыта Вячеслав Куличкин, СР Бэтэрээннэрин сэбиэтин председателэ Аркадий Саввинов – “Кыайыы уотун” тутан сүүрээччилэргэ туттардылар.

Салгыы Н.Н. Тарскай аатынан “Туймаада” стадиоҥҥа, сарсыардааҥҥы сэрээккэни үөрүүлээхтик аһыыга кытынныбыт.

Дьэ онтон сүүрүү кыттыылаахтара: Анна Егорова, Наталья Неустроева, Валентина Винокурова, Аня Егорова, Олег Попов буоламмыт Дьокуускай – Хомустаах – Никольскай – Нам – Хатыҥ Арыы – Модут – Хатырык хайысхатынан барыта 110 км сүүрдүбүт.

Ол курдук, Хатыҥ Арыыга билиилээх государственнай деятель Илья Егорович Винокуров пааматынньыгар сибэкки дьөрбөтүн уурдубут, өйдөөн-санаан аастыбыт. Оттон Хомустаахха Кыайыы болуоссатыгар сылдьан, үөрэппит учууталларбар, тыыл уонна үлэ бэтэрээннэрэ Акулина Ильинична Колесоваҕа, Семен Семеновичка сылдьан эҕэрдэлээн, кэпсэтэн аастыбыт. Хатырык бөһүөлэгэр биллиилээх государственнай деятель Максим Кирович Аммосов музейыгар сылдьан көрдүбүт-иһиттибит.

Бары, “Кыайыы уотун” көрсүбүт, тэрийсибит дьоҥҥо, салайааччыларга уонна суоппарбытыгар Владимир Дегтяревка барҕа махтал!

Дмитрий ГОРОХОВ, “Кыайыы уота” сүүрүү салайааччыта.