Бэйэбит бөҕөстөрбүтүгэр эрэнэбит

Кэлэр сэттиэлэҕэ, бэс ыйын 4-7 күннэригэр Монголия киин куоратыгар – Улан Баторга Тустуу аан дойдутааҕы федерациятын (UWW) Азия регионугар спортивнай тустууга рейтиннээх күрэхтэһиитэ ыытыллар. Күрэхтэһии гректии-римнии, дьахталлар уонна көҥүл тустуу көрүҥнэригэр буолуоҕа.

Биллэн турар, саха тустуутун сэҥээрээччилэрин сүрүн болҕомтолоро бэс ыйын 6-7 күннэригэр буолуоҕа. Ити күннэргэ – күрэхтэһии көҥүл тустууга хапсыһыылара ыытыллаллар. Бу түһүлгэҕэ саха тустууга кыһатын иитиллээччилэрэ Айаал Белолюбскай, Георгий Окороков уонна Константин Капрынов кыттарга бэлэмнэнэллэр. Чопчулаан эттэххэ, кинилэр ааттара – күрэхтэһии кыттыылаахтарын сайаапкатыгар баар.

Таджикистан аатыттан кыттар Айаал Белолюбскай 57 киилэҕэ кыттыаҕа. Сайаапкаттан көрдөххө, кини сүрүн утарсааччыларынан аан дойду чемпиона Чонг Сонг Хан (КНДР), Россия чемпиона, Европа призера Муса Мехтиханов, олохтоохтор эрэллэрэ – И.Ярыгин турнирын быйылгы кыайыылааҕа, Азия чемпионатын икки төгүллээх призера Мунх-Эрдэнэ Батхуяг буолуохтара. Ону тэҥэ Индия, Казахстан бөҕөстөрө үгэс быһыытынан күүстээхтэр.

Иккис кыттааччыбыт – «австралиец» Георгий Окороков бэйэтин бойобуой ыйааһыныгар – 61 киилэҕэ тустуоҕа. Манна даҕаны састаап куһаҕана суох. Иран, Индия, Казахстан, Кыргызстан эдэр талааннаах тустууктара бааллар. Россияттан бурят Баир Баяндуев сайаапкаҕа киирбит.

Манна даҕатан эттэххэ, UWW сайтыгар бу турнир сайаапката турбута син ыраатта. Онон баҕар тоҕоостоох кэмигэр уларыйыылар тахсыахтарын сөп.

Дьэ уонна үһүс кыттааччыбыт – Саха сирин көҥүл тустууга сүүмэрдэммит хамаандатын хапытаана Константин Капрынов бу сырыыга бэйэтин бойобуой ыйааһыныгар – 70 кг сайаапкаҕа турар. Билэргит курдук, кини соторутааҕыта Али Алиев турнирыгар бэйэтин күүһүн 74 киилэҕэ холонон көрбүтэ уонна бэһис миэстэлэммитэ.

Монголия көбүөрүгэр 70 киилэҕэ Капрыновы тэҥэ Азия быйылгы чемпиона индус Абхиманью, монголлар бэйэлэрэ эркин курдук эрэнэр киһилэрэ – тустууга баай үөрүйэхтээх Азия оонньууларын кыайыылааҕа, аан дойду чемпионатын икки төгүллээх призера Тумур-Очир Тулга, Россия эдэрдэргэ хамаандатыттан Магомед Эльтемиров уонна Казахстантан Анчугин, Досжанов диэн опыттаах бөҕөстөр бааллар.

Дьэ, ити курдук, сайаапканы ырытан көрдөххө, уолаттарбыт үһүөн мэтээл иһин киирсэр кыахтаахтар. Оттон ханнык өҥнөөх мэтээли ылаллара – кинилэр бүгүҥҥү туруктара, бэлэмнэрэ быһаарыа. Капрынов былырыын маннык түһүлгэҕэ чаҕылхайдык тустан бастаабыта.

Манна сыһыары тутан эттэххэ, Россия хамаандата бу түһүлгэҕэ састааба маннык: 57 кг – Муса Мехтиханов, 61 кг – Баир Баяндуев, 70 кг – Константин Капрынов, Магомед Эльтемиров, 74 кг – Тамир Ешинимаев, Тумэн Бодиев, 79 кг – Исмаил Ханиев, 86 кг – Абдулмуслим Абдулмуслимов, 92 кг – Асхаб Садулаев, 97 кг – Магомед-Тагир Ханиев, 125 кг – Тимур Котаев.

Күрэхтэһии тосхоло (Дьокуускай бириэмэтинэн)

Бэс ыйын 6 күнэ, субуота

11:30-13:30 Барыллааһын хапсыһыылар — 74, 86, 92 кг

13:30-14:30 Финалга тахсар иһин киирсиилэр

14:30-15:00 Санааны уоскутар бөлөх тустуулара

18:00-21:00 Финаллар. Наҕараадалааһын.

Бэс ыйын 7 күнэ, өрөбүл

11:30-13:30 Барыллааһын хапсыһыылар — 57, 61, 65, 70, 79, 97, 125 кг

13:30-14:30 Финалга тахсар иһин киирсиилэр

14:30-15:00 Санааны уоскутар бөлөх тустуулара

18:00-21:00 Финаллар. Наҕараадалааһын.

Петр ПАВЛОВ.  

Ааптар хаартыската.