Бастакы күн түмүгүнэн икки мэтээл

Дагестан Каспийскай куоратыгар номоххо киирбит Али Алиев кэриэһигэр көҥүл тустууга норуоттар икки ардыларынааҕы 56-с турнир ыытылла турар. Бастакы күн түмүгүнэн биэс ыйааһыҥҥа кыайыылаахтар уонна призердар быһаарылыннылар.

Саха сирин хамаандатыттан Федор Постников 57 киилэҕэ уонна Олег Фомин 74 киилэҕэ – пьедестал үһүс үктэлигэр тахсан, боруонса мэтээллэринэн наҕараадаланнылар.

Кылгастык билиһиннэрдэххэ, 57 киилэҕэ тоҕус эрэ кыттааччы баара. Биһиги Федор Постниковпыт бастаан, соторутааҕыта Грознайга ыытыллыбыт 24-гэр диэри саастаахтарга Россия күрэхтэһиитигэр үһүс бириистээх миэстэ иһин киирсиигэ Лев Павловка хотторбут – Тунджай Вердиевы (Воронеж) эрэллээхтик хоппута. Оттон финалга тахсар иһин хапсыһыыга Шамседин Бабаевка (Дагестан) сабырыйтаран кэбиспитэ.

Бу ыйааһыҥҥа боруонса мэтээли ким ыларын быһаарар «аччыгый финалга» Постников – Д.Рабадановы (Дагестан) 4:2 кыайан, пьедестал үһүс үктэлигэр таҕыста. Онон бу сырыытыгар Федор икки күрэхтэһиигэ кыттан – иккиэннэригэр мэтээллээх эргиллэн иһэр. Ол курдук, ыам ыйын 7-8 күннэригэр Санкт-Петербург куоракка ыытыллыбыт «Кыайыы күнэ» Бүтүн Россиятааҕы аһаҕас турнирга кыһыл көмүс мэтээли ылбытын санатар тоҕоостоох.

74 кг ыйааһыҥҥа 25 бөҕөс күөн көрүстэ. Олег Фомин бастакы эргииргэ сынньанан баран, финал 8/1-гэр азербайджанец Г.Омаровы, салгыы дагестанец Алибековы кыайталаан баран, финалга тахсар иһин киирсиигэ турок Мухамет Бесиры кытта көрүстэ.

Мухамет Бесир диэн бу – ингуш Магомед-Башир Ханиев, үс ини-бии Исмаил, Магомед-Тагир Ханиевтар убайдара. Кини бу иннинэ Азербайджан хамаандатыттан кыттан, эдэрдэргэ Европаҕа уонна аан дойдуга бастыы сылдьыбыт талааннаах тустуук. Ханиев аны быйылгыттан Турцияҕа көһөн, Мухамет Бесир диэн ааты ылыммыт. Киниэхэ Олег Фомин 3:5 ахсаанынан хоттордо.

Оттон үһүс бириистээх миэстэ иһин тустууга, эмиэ Бесирга хотторбут Константин Капрыновы 2:1 кыайан, Олег Фомин боруонса мэтээли ылары ситистэ.

Санатан эттэххэ, бу турнирга ыйааһын аайы бастаабыттар — 100, иккис буолбуттар — 50, үһүстээбиттэр — 30 тыһ. солк. харчынан наҕараадаланнылар.

Бастакы күн түмүгүнэн өссө 65 киилэҕэ кыттыбыт Василий Григорьев куһаҕана суох өйдөбүлү хаалларда. Кини бастаабыт Ферзалиевка (Дагестан) хотторон баран, санааны уоскутар бөлөххө икки дагестанеһы бэркэ кыайталаан, боруонса мэтээл иһин Руслан Абдуллаевка (Азербайджан) 8:11 ахсаанынан сабырыйтаран, бочуоттаах бэһис миэстэни ылла.

97 киилэҕэ Никита Софронов эмиэ бэйэтин холугар үчүгэй тустуулары көрдөрдө.

Уолаттарбыт тустууларын түгэнин (видеотын) “Дьулурҕан” хаһыат телеграмҥа каналыгар – t.me/dzulurgan көрүөххүтүн сөп.

Аны бүгүн – 61, 70, 79, 92 уонна 125 кг ыйааһыннарга бастыҥнар быһаарыллыахтара. Манна биһиги эмиэ, Александр Авелов, Ньургун Сергин, Харысхан Баппаҕай… курдук эрэнэр уолаттардаахпыт.

Бүгүн күрэхтэһии Дьокуускай бириэмэтинэн киэһэ 17:00 чаастан саҕаланар.

Петр ПАВЛОВ.