Али Алиев турнирыгар…

Ыам ыйын 16-17 күннэригэр Дагестан Каспийскай куоратыгар аан дойду биэс төгүллээх чемпиона, ССРС спордун үтүөлээх маастара Али Алиев кэриэһигэр көҥүл тустууга үгэскэ кубулуйбут норуоттар икки ардыларынааҕы турнир ыытыллар.

Бу күрэхтэьиигэ 14 дойдутан барыта 200-чэкэ бөҕөс кытталлара күүтүллэр. Саха сириттэн тустуохтара: 57 кг – Постников Федор, 61 кг – Авелов Александр, 65 кг – Кривошапкин Владислав, Григорьев Василий, 70 кг – Некрасов Сергей, 74 кг – Капрынов Константин, Фомин Олег, Винокуров Василий, Бабаранов Иннокентий, 86 кг – Ленскэй Андриан, 92 кг – Сергин Ньургун, 97 кг – Аронов Евгений, Толмачев Максим, Софронов Никита, 125 кг – Баппаҕай Харысхан.

Бу күрэхтэһии биһиги уолаттарбытыгар Россия көҥүл тустууга чемпионатын иннинэ бэйэни тургутан көрүүгэ сыаллаах-соруктаах буолуоҕа. Кэккэ бөҕөстөр сыл саҕаланыаҕыттан тохтоло суох хас да түһүлгэҕэ кыттан эриэ-дэхси көрдөрүүлэннилэр. Оттон тумус туттар тустууктарбыт Александр Авелов, Константин Капрынов уонна Ньургун Сергин – тохсунньуга Ярыгин турнирын кэнниттэн ханна да күрэхтэһэ иликтэр. Ол оннугар кинилэр бу кэм устата наар анал үөрэтэр-эрчийэр түмсүүгэ кыттан, бэйэлэрин тустар маастарыстыбаларын чочуйдулар. Онон бөҕөстөрбүт билиҥҥи кэмҥэ туох-ханнык таһымҥа сылдьалларын көрүөхпүт.

Түһүлгэ тосхоло:

(Дьокуускай бириэмэтинэн)

Ыам ыйын 16 күнэ, субуота

17:00 – 22:00 57, 65, 74, 86, 97 кг барыллааһын хапсыһыылар

22:00 – 23:00 Күрэхтэһиини үөрүүлээхтик аһыы

23:00 – 00:00 Финалга тахсар иһин киирсиилэр

00:00 – 01:00 Санааны уоскутар бөлөх тустуулара

01:00 – 03:00 Финаллар.

Ыам ыйын 17 күн, өрөбүл

17:00 – 23:00 61, 70, 79, 92, 125 кг барыллааһын хапсыһыылар

23:00 – 00:00 Финалга тахсар иһин киирсиилэр

00:00 – 01:00 Санааны уоскутар бөлөх тустуулара

01:00 – 03:00 Финаллар.

“Дьулурҕан”.