Александра Ушницкая аһаҕас дьарыга

Былыттаах, тыаллаах-куустаах күннэр кэннилэриттэн, бүгүн өрөбүл күн — киһи эрэ көй салгыҥҥа сылдьыах, чэбдигирэ хаамыах, сүүрүөх-көтүөх айылаах чаҕылхай күннээх сырдык күнэ буолла.

Сарсыарда Н.Н. Тарскай аатынан «Туймаада» стадиоҥҥа дьон бөҕө тоҕуоруста. Бу, общественнай тренер, Дьокуускай куорат 39 №-дээх оскуолатын ресурснай киинин салайааччыта, педагогическай наука кандидата Александра Егоровна Ушницкая эти-хааны чэбдигирдиигэ аһаҕас дьарыгар муһуннулар.

Александра Егоровна бэйэтин чөҥ куолаһынан чэбдигирдэр гимнастика хас биирдии хамсаныыларын быһааран биэрэрин, стадион сүрүн түһүлгэтигэр кэчигирээн турбут, уруккуттан эрчиллибит дьон сэргэх музыкаҕа доҕуһуоллатан бары биир киһи курдук хатылаан истилэр. Оттон бу аһаҕас дьарык буоларын истэн кэлбит дьон стадион трибунатыгар туран, эмиэ эрчиллиини үтүктэн истилэр.

Бастаан эти-хааны уһугуннарар эрчиллииттэн саҕалаан улам уустук хамсаныыларга киирэн истилэр. Ол быыһыгар ураҕастаах (паалкалаах) эрчиллии оҥоһуллан, дьарык ис хоһоонун байытан, киэргэтэн биэрдэ.

Дьарык бүтүүтэ Александра Егоровна, кинини маннык дьарыкка уһуйбут дьонугар Валерий Иванович Готовцевка уонна Федот Павлович Максимовка махталын биллэрдэ итиэннэ маннык чэбдигирдэр гимнастика дьарыга салгыы киэҥ далааһыннанан ыытылларыгар, тэриллэригэр дьон-сэргэ көхтөөхтүк кыттарыгар ыҥырда.

Бу интэриэһинэй тэрээһини Саха Республикатын физическэй култуураҕа уонна маассабай спорка управлениета көҕүлээн, тэрийэн ыыппытын мустубут дьон биһирии көрүстүлэр.

Петр ПАВЛОВ.

Ааптар хаартыскалара.