Уолаттарбытыгар эрэнэбит!

Ыам ыйын 1-3 күннэригэр Чечня Республикатын киинигэр – Грознай куоракка 24-гэр диэри саастаах бөҕөстөр Россия үрдүнэн бастыыр иһин күрэхтэһиилэрэ ыытыллар. Бу саастаахтарга тургутуулаах түһүлгэҕэ биһиги республикабыт бөҕөстөрө эмиэ кытталлар.

Кинилэр бу кэм устата анал бэлэмнэниини баран, сүрүн болҕомтолорун, күүстэрин Грознай көбүөрүгэр ситиһиилээхтик кыттыыга уураллар. Биллэн турар, киһи барыта, Саха сирин икки кэнники сылларга бастыҥ спортсменынан ааттаммыт Лев Павловтан элбэҕи күүтэр. Кини тохсунньуга Ярыгин турнирын кэнниттэн ханна даҕаны туста илик. Бу кэм устата, биллиилээх тренер Владимир Модосян салалтатынан анал үөрэтэр-эрчиллэр бэлэмнэниини барда. Онон ханнык таһымҥа тахсыбытын көрүөхпүт.

Саха сирин хамаандата:

57 кг – Лев Павлов, Айсен Иванов, Кэскил Семенов, Данил Мохначевскай

61 кг – Артём Слепцов, Дамир Явловскай, Виктор Яковлев, Уйгун Степанов

65 кг – Эдуард Попов, Аслан Трофимов, Николай Щеглов, Василий Григорьев, Юлиан Григорьев, Арсен Кононов

70 кг – Игорь Матвеев, Сергей Некрасов, Анатолий Иванов

74 кг – Владимир Бояновскай, Иннокентий Бабаранов, Алексей Захаров

97 кг – Евгений Аронов.

Ылан көрдөххө, хамаандаҕа күүстээх бөҕөстөр киирдилэр. Кинилэр бу сүрүн күрэхтэһиигэ бэлэмнэнэн, кэккэ түһүлгэлэргэ кыттан эриэ-дэхси көрдөрүүлэннилэр. Онон бэлэмнээх курдуктар диэххэ сөп.

Урукку өртүгэр Грознай көбүөрэ саха бөҕөстөрүгэр түһүлгэлээх, бааттаах буолара. Ол курдук, Лев Павлов уонна Андрей Мидловец иллэрээ сыл Чечня киин куоратыгар, 21-гэр диэри саастаахтарга Россия күрэхтэһиитигэр ситиһиилээхтик кыттан, көҥүл тустууга дойду сүүмэрдэммит хамаандатын састаабыгар киирэн Европа, аан дойду көбүөрдэригэр эриэ-дэхси көрдөрүүнү ситиспиттэрэ. Бу сырыыга дьэ хайдах буолар?

Күрэхтэһии ыйааһыннарынан сеткаларын, кэккэ видеолары, суһал сонуннары «Дьулурҕан» телеграмҥа каналыгар — t.me/dzulurgan көрүөххүтүн сөп.

Күрэхтэһии ыам ыйын 1 күнүгэр Дьокуускай бириэмэтинэн 17:00 чаастан саҕаланар. Бастакы күн – 57, 65, 70, 74, 79 уонна 97 кг ыйааһыннаахтар тусталлар уонна финалистары быһаарсаллар. Уолаттарбытыгар эрэнэбит!

Петр ПАВЛОВ.