Уолаттарбыт хоттордулар

Кыргызстаҥҥа көҥүл тустууга Азия чемпионата ыытылла турар. Бу күрэхтэһиигэ саха тустууга кыһатын икки иитиллээччитэ кыттара эрдэттэн биллибитэ. Кинилэр сөптөөх бэлэми ыытаннар, мэтээлгэ суоттанан барбыттара…

Онно эрэнэн, Дьокуускайтан тустууну таптааччылар, суруналыыстар көрө, уолаттарбытыгар ыалдьа диэн ааттаан барбыттара. Ол эрээри, биһиги эрэлбит туолбата.

Бастакынан көбүөргэ Виктор Рассадин (70 кг) тахсыбыта. Кини утарсааччытынан – Азия уонна аан дойду чемпиона дьоппуон Тайши Нарикуни буолла. Виктор тустууну үчүгэйдик саҕалаабыта. Иккис түһүмэххэ биир түгэҥҥэ бэйэтэ кимэ сылдьан атаҕын эчэттэ. Онон сылтаан хапсыһыыны сатаан ыыппакка, түмүккэ 4:7 ахсаанынан хотторон кэбистэ.

Манна, тустуутунан көрдөххө, биһиги бөҕөспүт ордук курдук этэ гынан баран, эчэйиитэ мэһэйдээн, киирсии кэмигэр хаста да быраастанан – кыаҕын сатаан туһаммата.

Салгыы күрэхтэһиигэ Нарикуни – көбүөр хаһаайына Эрназар Акматалиевка хотторон, биһиги эрэлбитин сотон таһаарда. Онон Рассадин күрэхтэһииттэн туоруурга күһэлиннэ.

Оттон иккис бөҕөспүт Айаал Белолюбскай (57 кг) – олохтоохтор эрэллэрэ Абдымалик Карачовка 4:8 ахсаанынан сабырыйтарда. Манна даҕаны биһиги уолбут дух-дах туттан, сатаан тустубата. Тоҕо диэтэргит, утарсааччыта оннук наһаа күүстээх бөҕөс буолбатах этэ дии саныыбын.

Карачов финалга тахсар иһин киирсиигэ монгол Мунх-Эрдэнэ Батхуягка хоттордо. Онон Белолюбскай эмиэ күрэхтэһииттэн эрдэ туораата.

Хайыахпытый, күрэхтэһии аата – күрэхтэһии буоллаҕа, ким эрэ кыайар, ким эрэ хотторор. Уолаттарбыт хотторууларын тренердэр уонна специалистар үчүгэйдик ырытан, кытаанах уруок оҥостон, инникитин көннөрүнэргэ үлэлэһэллэригэр баҕарабыт. Атын даҕаны күрэхтэһиилэр элбэхтэр.

Бүгүҥҥү финалларга көрсүөхтэрэ:

57 кг: Мунх-Эрдэнэ Батхуяг (Монголия) – Милад Вализаде (Иран)

65 кг: Сужит Калкал (Индия) – Умиджон Джалолов (Узбекистан)

70 кг Тумур-Очир Тулга (Монголия) – Абхиманью (Индия)

79 кг Кейсан Гаредаги (Япония) – Сандип Манн (Индия)

97 кг Амирали Азарпира (Иран) – Араш Йошида (Япония)

PS: Уолаттарбыт тустууларын уонна атын хапсыһыылар видеоларын “Дьулурҕан” телеграмҥа каналыгар – t.me/dzulurgan көрүөххүтүн сөп.

Петр ПАВЛОВ.