Тустууктар уоскуйары билбэттэр

Муус устар 4 күнүгэр «Өрөгөй» Спорка бэлэмнэнии киинигэр дьахталларга уонна эр дьоҥҥо көҥүл тустууга Дальнай Восток федеральнай уокуругун чемпионата ыытыллар.

Бу күрэхтэһии түмүгүнэн бастыҥнар от ыйын 29 – атырдьах ыйын 2 күннэригэр Москваҕа буолуохтаах Россия чемпионатыгар кыттар кыахтаныахтара.

Чемпионакка – Саха сирин хамаандатыттан, ааспыт сэттиэлэҕэ Тааттаҕа ыытыллыбыт Н.Н. Тарскай кэриэһигэр республика чемпионнара буолбут Федор Постников, Яков Павлов, Виктор Яковлев, Айсен Потапов, Олег Фомин, Андриан Ленскэй, Никита Софронов, Никита Хабаров кыттыахтара. Ону тэҥэ Дальнай Восток уокуругун 24-гэр диэри саастаахтарга күрэхтэһиитин кыайыылаахтара Василий Григорьев, Сергей Некрасов, Владимир Бояновскай тустуохтара.

Биллэн турар, сүрүн утарсааччыларбытынан буряттар буолуохтара: 57 кг Жаргал Баяндуев, 61 кг Бато Сультимов, 65 кг Борис Баршуев, 70 кг Игорь Упхоев, 74 кг Тумэн Дондоков, 79 кг Евгений Жербаев, 86 кг Буянто Шадапов, 92 кг Илья Жибалов, 97 кг Кирилл Эрхитуев.

Онон 125 кг ураты бары ыйааһыннарга бастакы миэстэ иһин Саха сирэ – Бурятия бөҕөстөрө күөн көрсөллөрө күүтүллэр.

Былырыын эмиэ биһиэхэ (“Кыайыы 50 сыла” Спорт дыбарыаһыгар) ыытыллыбыт маннык чемпионакка ыйааһыннарын бэрээдэгинэн бастаабыттара: Федор Постников, Петр Константинов, Эдуард Попов, Игорь Матвеев, Айсен Потапов (бары Саха сирэ), Тамир Ешинимаев (Бурятия), Андриан Ленскэй, Ньургун Сергин, Максим Толмачев (үһүөн Саха сирэ) уонна Балдан Цыжипов (Бурятия). Бу сырыыга дьэ хайдах буолар?

Дьахталларга эмиэ уон ыйааһыҥҥа тустуу буолуоҕа.

Чемпионат тосхоло

Муус устар 13 күнэ, чөл күн

17:00 Бары ыйааһыннарга сэрэбиэй.

Муус устар 14 күнэ, сүбэ күн

10:00-18:00 Барыллааһын хапсыһыылар

12:00-12:30 Чемпионаты үөрүүлээхтик аһыы

18:30-20:00 Быһаарыылаах хапсыһыылар. Кыайыылаахтары наҕараадалааһын.

Петр ПАВЛОВ.