Тустуу түһүлгэтин сэрэбиэйэ хайдаҕый?

Сарсын, муус устар 4 күнүгэр «Өрөгөй» күрэс уораҕайыгар эр дьоҥҥо уонна дьахталларга Дальнай Востоктааҕы федеральнай уокурукка спортивнай тустууга бастыыр иһин чемпионат ыытыллар. Күрэхтэһиигэ Бурятияттан, Амурскай уонна Хабаровскай уобаластартан биирдиилээн спортсменнар кэллилэр.

Манна ситиһиилээхтик кыттыбыттар – аны сайын буолар Россия чемпионатыгар кыттар кыаҕы ылар буоланнар, күрэхтэһии сытыы тыҥааһыннаах буолара күүтүллэр.

Билигин эр дьоҥҥо биирдиилээн ыйааһыннарынан сэрэбиэй хайдах буолбутун ырытан көрүөххэ.

57 киилэҕэ барыта 18 бөҕөс күөн көрсөр: үс бурят, уоннааҕылара бэйэбит тустууктарбыт. Манна Федор Постниковы уонна Алексей Копыловы, бастыҥ көрдөрүүлээхтэр диэн, бөлөхтөрү баһылааччынан туруорбуттар.

Постников бөлөҕөр – Анатолий Иванов, Любомир Ашеин, Данил Мохначевскай бааллар. Ыалдьыттарбыт – буряттар иккиэн биир бөлөххө түбэспиттэр. Онон квалификацияҕа Б.Шагдуров – В.Мордовскойдуун, финал 8/1-гэр А.Шаракшинов – П.Копыловтуун, Ж.Баяндуев – Р.Кириллинниин киирсэллэр.

Дьэ, ааспыт сэттиэлэҕэ Тааттаҕа, Тарскайга бастаабыт Федор Постников кыайыы көтөллөнүө дуо? Ини-бии Копыловтар финалга тиийиэхтэрэ дуо? Барытын сарсын билиэхпит.

61 кг ыйааһыҥҥа 16-лар. Итинтэн 15-һэ бэйэбит бөҕөстөрбүт. Кинилэр сүрүн утарсааччыларынан – бу күһүн Д.П. Коркин аатынан норуоттар икки ардыларынааҕы турнирга иккистээбит Бато Сультимов буолуоҕа. Бурят баатырын илиитин-атаҕын күүһүн бастаан Дамир Явловскай тургутан көрүөҕэ. Бу бөлөххө өссө Валентин Бурнашев, Яков Павлов, Юрий Винокуров, Ньургун Терентьев курдук тэҥ күүстээх тустууктарбыт бааллар. Онон үчүгэй хапсыһыылары көрүөхпүт.

Бу ыйааһын аллараа бөлөҕөр Артур Макаров, Егор Явловскай, Манчаары Ильинов бааллар. Финалга кинилэртэн биирдэстэрэ тахсара буолуо диэн сабаҕалыыбын.

65 киилэҕэ бастакы миэстэ иһин 15 бөҕөс күөн көрсүө. Манна Бурятияттан Баршуев, Мункуев бааллар, уоннааҕылара бэйэбит бөҕөстөрбүт. Сэрэбиэйгэ Владислав Кривошапкины уонна Виктор Яковлевы араарбыттар диэххэ сөп. Бүтэһик быһаарыылаах хапсыһыыга кинилэр солоон тиийиэхтэрэ дуу? Манна, ааспыт сэттиэлэҕэ 24-гэр диэри саастаахтарга Дальнай Восток зонатын кыайыылааҕа, сайаапкаҕа суруллубут Василий Григорьев тоҕо эрэ суох.

70 киилэҕэ – 22 кыттааччы сэрэбиэйи ааспыт. Манна бурят Боровицкайы уонна Игорь Матвеевы – бөлөхтөр баһылыктара оҥорбуттар. Үөһэ бөлөххө үс бурят баар эбит. Кинилэргэ уолаттарбыт утарсыы оҥоруохтара дуо?

Аллараа бөлөххө Жигзымаевы, Гергеновы уолаттарбыт кыайаллар ини. Ылан көрдөххө, ыалларбыт бу ыйааһыны ылардыы оҥостон кэлбиттэр курдук. Уолаттарбытыгар эрэнэбит.

74 кг – уон бөҕөс баар. Ааспыт сэттиэлэҕэ Саха сирин чемпионнарынан буолбут Олег Фомины уонна Айсен Потаповы туспа бөлөхтөргө араарбыттар. Өссө бу ыйааһыҥҥа эдэрдэргэ Дальнай Восток зонатын кыайыылааҕа Владимир Бояновскайы көрүөхпүт.

Санатан эттэххэ, былырыын эмиэ биһиэхэ (“Кыайыы 50 сыла” Спорт дыбарыаһыгар) Дальнай Восток зонатын финалыгар Олег Фомин – Айсен Потапов көрсүбүттэрэ. Онуоха Дьааҥы бөҕөһө кыайбыта. Бу сырыыга хайдах буолар?

79 киилэҕэ – алта бөҕөс баар. Манна бу түһүлгэ саамай үрдүк ааттаах-суоллаах бөҕөһө – Россия чемпиона, аан дойду чемпионатын призера Евгений Жербаев (Бурятия) эдэр уолаттары тургутуоҕа.

86 кг эмиэ алта кыттааччы сэрэбиэйи ааспыт. Сылыктаан көрдөххө, бастакы миэстэ иһин Буянто Шадапов уонна Андриан Ленскэй киирсиэхтэрэ.

92 кг – алта кыттааччы. Манна Степан Ивановка эрэнэбит. Манна Илья Жибалов (Бурятия), Эмиль Рамазанов (Хабаровскай), Алексей Ефимов бааллар.

97 кг – эмиэ алта кыттааччы. Бу ыйааһыҥҥа республика 4 төгүллээх чемпиона буолбут Никита Софроновка эрэнэбит.

Оттон 125 киилэҕэ – түөрт кыттааччы, барыта бэйэбит бухатыырдарбыт. Онуоха тустуутун тэтимин ылбыт Никита Хабаров бастыырыгар билгэлиибит. Ол эрээри, ону, урут кинини кыайа сылдьыбыт Харысхан Баппаҕай сөбүлүү истибэт буолуохтаах. Чэ, көбүөр көрдөрүө. Манна сыһыары тутан эттэххэ, чуо бу күҥҥэ «Модуҥҥа» П.Е. Алексеев аатынан СӨ хапсаҕайга чемпионата ыытыллар. Хабаров онно эмиэ кыттар.

Былырыын маннык күрэхтэһиигэ бөҕөстөрбүт аҕыс ыйааһыҥҥа кыайбыттара, састаабы ырытан көрдөххө – быйыл даҕаны ону хатылыыр кыахтаахтар.

Петр ПАВЛОВ.  

Александр НАЗАРОВ хаартыската.