Тустуу үбүлүөйдээх сылын түһүлгэтэ

Олимпийскай чемпион Павел Пинигин аатыгар «Саха сирин тимир суоллара» тэрилтэ бирииһигэр көҥүл тустууга оҕолорго аһаҕас республикатааҕы, Бүтүн Россиятааҕы уонна норуоттар икки ардыларынааҕы турнирдары үөрүүлээхтик аһыы – Саха Республикатыгар тустуу сайдыбыта 70, биһиги бөҕөстөрбүт Монреаллааҕы-76 Олимпиадаҕа өрөгөйдөрүн 50 сылларыгар сөп түбэһиннэриллэн ыытылынна.

Бэлиэ күҥҥэ СР Правительствотын председателин солбуйааччы Сергей Местников, «Саха сирин тимир суоллара» тэрилтэ салайааччытын солбуйааччы Алексей Местников, аан дойду чемпиона, Олимпиада-80 үрүҥ көмүс призера Магомедхан Арацилов, аан дойду уонна Азия чемпионаттарын призера Буяндергер Болд (Монголия), олимпийскай чемпион, спорт үтүөлээх маастара Павел Пинигин кыттыыны ыллылар уонна мустубут дьону Тустуу бырааһынньыгынан эҕэрдэлээтилэр, оттон тустуук оҕолорго – ким үчүгэй бэлэмнээх, кыайыыга дьулуурдаах – ол кыайарыгар баҕардылар.

Быйылгы, үбүлүөйдэргэ ананан ыытыллар үгэскэ кубулуйбут күрэхтэһиилэргэ барыта 1285 эдэр бөҕөс күөн көрсөр. Россия араас регионнарын тэҥэ көбүөргэ Монголия, Беларусь, Кыргызстан, Казахстан, Таджикистан оҕолоро тахсан ким күүстээҕин быһаарсаллар. Номнуо, аһаҕас республикатааҕы турнир түмүктэннэ.

Турнир түмүгүн манна көр: https://dzulurgan.ru/2026/04/itogi-otkrytogo-respublikanskogo-turnira-pavla-pinigina/

Аны бүгүн киэһэ Бүтүн Россиятааҕы турнир кыайыылаахтара быһаарыллыахтара. Сарсын – норуоттар икки ардыларынааҕы түһүлгэ түмүгүн билиэхпит.

Барыгытын «Өрөгөй» Спорка бэлэмнэнии киинигэр ыҥырабыт!

Петр ПАВЛОВ.

Ааптар хаартыскалара.