Түһүлгэ бастыҥ бөҕөһө – Вася Флегонтов

“Өрөгөй” күрэс уораҕайыгар олимпийскай чемпион Павел Пинигин аатынан «Саха сирин тимир суоллара» тэрилтэ бирииһигэр көҥүл тустууга оҕолорго күрэхтэһии үгэннээн ыытылла турар. Санатан эттэххэ, бу күрэхтэһии үс түһүмэхтээх, ол аата – аһаҕас өрөспүүбүлүкэтээҕи, Бүтүн Арассыыйатааҕы уонна норуоттар икки ардыларынааҕы тус-туспа күрэхтэһиилэр.

Биллиилээх тустуук, улуу тренер Д.П. Коркин аатынан норуоттар икки ардыларынааҕы турнир кыайыылааҕа, Иван Ярыгин кэриэһигэр Гран-при турнир иккис миэстэлээҕэ, норуоттар икки ардыларынааҕы кылаастаах спорт маастара Владимир Флегонтов төрөппүт уола – Вася Флегонтов Бүтүн Арассыыйатааҕы түһүлгэ бастыҥ бөҕөһүнэн ааттанна.

Кини 47 кыттааччы күрэс былдьаспыт 41 кг ыйааһыныгар бастакы миэстэни ылла. Бастакы миэстэ иһин быьаарыылаах киирсиигэ Чурапчыттан Ваня Фомины, хардары-таары бырахсыылаах тустууга, кыайыыга дьулуурдаах буолан хотто.

Санатан эттэххэ, Вася – тренердэр Д.Н. Сивцев, А.Н. Прохоров салалталарынан тустуунан дьарыктанар.

Кыайыылаахтары наҕараадалааһыҥҥа Вася Флегонтовка, тэрийээччилэр быһаарыыларынан «Түһүлгэ бастыҥ бөҕөһө» анал бириис туттарылынна. Васяҕа бу ситиһии, күүһүгэр – күүс, санаатыгар – санаа, иннигэр сыал-сорук буоларыгар баҕарыаҕыҥ. Бу курдук көтөллөнөн, аҕатын курдук, улахан спорка үрдүк ситиһиилэнэригэр!

Манна даҕатан эттэххэ, бу иннинээҕи аһаҕас өрөспүүбүлүкэтээҕи түһүлгэ бастыҥ бөҕөһүнэн Хаҥаластан Руслан Афанасьев буолбута.

Петр ПАВЛОВ.

Ааптар хаартыскалара.