Саха спордун үйэтитээччи

Бу күннэргэ “Өрөгөй” күрэс уораҕайыгар аан дойду үс төгүллээх чемпиона, Сэбиэскэй Сойуус, Европа чемпионаттарын кыайыылааҕа, ССРС спордун үтүөлээх маастара Павел Пинигин сайыҥҥы XXI Олимпийскай оонньууларга өрөгөйүн 50 сылыгар аналлаах, “Саха сирин тимир суоллара” тэрилтэ бирииһигэр көҥүл тустууга оҕолорго өрөспүүбүлүкэтээҕи, Бүтүн Россиятааҕы уонна норуоттар икки ардыларынааҕы турнирдар ыытыллаллар.

Ханнык баҕарар омук – бэйэтин олимпийскай чемпионунан киэн туттар. Кинини чиэстиир-бочуоттуур, элбэх көрсүһүүлэри, тэрээһиннэри, күрэхтэһиилэри тэрийэр, кинигэлэри, киинэлэри таһаарар.

Эһиги бу хаартыскаҕа Саха Республикатын физическэй култуураҕа үтүөлээх үлэһитэ, кыраайы үөрэтээччи, сэрии сылын оҕото Михаил Васильевич Алексеев – 1988 сыллаахха Аммаҕа ыытыллыбыт Павел Пинигин бирииһигэр өрөспүүбүлүкэтээҕи турнирга анаан оҥорон таһаарбыт Пресс-бюллетенин көрөҕүт.

М.В. Алексеев – Саха сирин спордун, физическэй култууратын сыныйан үөрэппитэ ыраатта. Кини дойдутугар Амма улууһун Мээндигэтигэр бэйэтэ туспа музейдаах, онно республика спордун туһунан элбэх баай матырыйааллар бааллар.

Михаил Васильевич матырыйаалларын үксүн архыыптартан хасыһан оҥорор-суруйар буолан, кини сырдатыылара барыта кырдьыктаахтар, оруннаахтар. Өссө спорт салайааччытынан үлэлии сылдьан, Аммаҕа ыытыллыбыт улахан таһымнаах күрэхтэһиилэргэ анаан Пресс-бюллетеннэри таһаарыыны көҕүлээбитэ. Онтукалара билигин үтүө өйдөбүнньүк, история чахчыта буолан – дьоҥҥо-сэргэҕэ уруккуну, хойуккуну санаталлар.

Бээрэ, олимпийскай чемпион Павел Пинигин аатынан көҥүл тустууга күрэхтэһиилэр хаһан, ханна саҕаламмыттарай?

Петр ПАВЛОВ.

Ааптар хаартыскалара.