Нам булчуттара “Саха-спортинг” кыайыылаахтара

Дьокуускайга муус устар 5 күнүгэр — Саха сиригэр булчут күнүн чэрчитинэн, аан маҥнайгытын “Саха-спортинг” диэн ааттанар күрэхтэһии ыытыллынна.

Бэлиэтээн эттэххэ, “Саха-спортинг” – саха төрүт көрүҥнэригэр “Манчаары оонньуулара” спартакиадаҕа көрүҥ быһыытынан киириэхтээҕэ былааннанар.

Аан маҥнайгытын ыытыллыбыт биэс бөлөххө спортинг күрэхтэһиитигэр республика үгүс улуустарыттан 90-ча кыттааччы күрэхтэспитин, — Нам улууһун булчуттарын уонна балыксыттарын түмсүүтүн председателэ Иван Яковлев этэр.

Ол курдук, биһиги улуустан 8 спортсмен булчут “булчуттар” уонна “убайдар” бөлөххө ситиһиилэннилэр. Намнааҕы “Сахатранснефтегаз” үлэһитэ Семен Охлопков саамай элбэх күрэхтэһээччилээх “булчуттар” бөлөххө 81 мишены табан, кыайыылаах үрдүк аатын ылбыт.

Оттон 89 табыылаах Иван Яковлев “убайдар” бөлөх муҥутуур кыайыылааҕынан ааттаммыт. Ону тэҥэ, хамаанданан ытыыга, Семен Охлопков, Владимир Винокуров састааптаах хамаанда үрүҥ көмүс мэтээли кэппит. “Убайдар” бөлөххө Иван Протопопов, Иван Яковлев хамаандата – боруонса мэтээл хаһаайыттара!

Нам улууһун булчуттарын үрдүк ситиһиилэринэн эҕэрдэлиибит!

Харысхан ПОПОВ.

Нам.