Кэбээйилэр хайыһар үбүлүөйүн күрэхтэһиинэн бэлиэтээтилэр

Унньуктаах уһун кыһын ааһан, сандал саас сандаарыччы тыкпыт күнүнэн сыламнаан кэлбитин Кэбээйи нэһилиэгин олохтоохторо сынньалаҥ пааркатыгар уруйдаан көрүстүлэр. Бу күн ырыаны, үҥкүүнү, атыыны-тутууну таһынан, түөлбэнэн күрэхтэһии тэрилиннэ.

Күрэхтэһии Саха сиригэр хайыһар спорда 100 сылынан, Аан дойдутааҕы «Лыжня России-2026» сүүрүү, Кэбээйигэ ХХ үйэҕэ аар-саарга аатырбыт хайыһардьыттарын өйдөөн-санаан ааһар аналлаах. Тэрээһин сүрүн сыалынан-соругунан нэһилиэк олохтоохторугар чөл олоҕу тарҕатыы, хайыһар спордугар болҕомтону ууруу, бастыҥ хайыһардьыттары бэлиэтээһин буолла.

Күрэхтэһиигэ түөлбэлэр оскуола үөрэнээччилэриттэн саҕалаан – 55 саастарын ааспыт кыттааччыга тиийэ бэлэмнээн киирэннэр, көхтөөх күрэхтэһии буолан ааста. Элбэх «ыалдьааччылаах», кыайыыга дьулуһуу күүрээннээх күрэс  түмүгэр түөлбэлэр кыайыы кынаттанан, кыайыылаахтар түөстэрэ мэтээлинэн килбэйэн, ураты көрдөрүүлээхтэр анал бириискэ тиксэн, санаалара көнньүөрдэ.

Саас сааһынан сырдатар буоллахха маннык. Түөлбэнэн күрэххэ, Альбина Егорова салайааччылаах «Күөх кытыл» түөлбэ спортсменнара бастаан таҕыстылар уонна XX үйэҕэ республикаҕа биллибит хайыһардьыт Е.Е. Эверстов ыччаттарыттан харчынан бириис тутта.

Иккис миэстэ минньигэс амтанын Наталья Обутова салайааччылаах «Ворошилов» түөлбэ биллэ. Бу түөлбэҕэ анал бирииһи – 1954-56 сс. республикаҕа хайыһар күрэхтэрин кыайыылааҕа И.В. Захаров ыччаттара анаатылар.

Онтон үһүс миэстэни Марианна Гуляева салайааччылаах «Тайылаахы» түөлбэ ситистэ. Бу түөлбэҕэ Саха сирин хайыһардьыт студеннарын хамаандатын чилиэнинэн сылдьыбыт М.И. Сметанина ыччаттарыттан анал бирииһи, түөлбэ хамаандатын хамандыыра Аполлон Гуляевка туттардылар. Түөлбэҕэ Е.Е. Эверстов ыччаттара анал бириистэрин туттаран үөрүүнү үксэттилэр.

Бэтэрээн спортсмен Е.А. Павлов анал бирииһин – 50-тан үөһээ саастаахтарга бастаабыт Агафья Евелева уонна Сергей Семенов ыланнар, махталларын тиэртилэр.

Чөл олоҕу күөрэччи тутар көхтөөх тэрээһини Т.С. Левин дириэктэр эбээһинэһин толорооччулаах оҕо спордун оскуолата тэрийэн ыытта. Тимофей Саввич уонна оскуола кэллэктиибэ хайыһар спордун дьоро күнүн тэрийиигэ анал бириистэри туруорбут бастыҥ хайыһардьыттар ыччаттарыгар махталларын биллэрдилэр. Итинник, хайыһар курдук үйэлэри уҥуордаан кэлбит спорт бастыҥ күрэхтэһиитин күнэ өрө күүрүүлээхтик ыытылынна.

Татьяна ЛАЗЕРЕВА.

Кэбээйи.