Бэтэрээн хайыһардьыттар көрүстүлэр

// Хайыһар успуордун 100 сыла

Быйыл Сахабыт сиригэр успуор көрүҥнэрэ: хайыһар, чэпчэки атлетика уонна дуобат төрүттэммиттэрэ 100 сыла. Онон сибээстээн муус устар 15 күнүгэр Уус Алдан улууһун бэтэрээн хайыһардьыттара мустан, бу бэртээхэй даатаны бэлиэтээн, уруккуну-хойуккуну ахтан-санаан аастылар.

Тэрээһин Дьокуускай куорат «Эллэй Боотур» дыбарыаһыгар баар успуор түмэлигэр ыытылынна. Бэтэрээннэри чиэстээһини киин куоракка олорор Уус Алдан бэтэрээн ыспарсымыаннарын сэбиэтэ уонна хайыһар өрөспүүбүлүкэтээҕи федерацията ыыттылар. Мустубут дьоҥҥо түмэл дириэктэрэ Михаил Друзьянов түмэлин устуоруйатын билиһиннэрдэ, успуор сонуннарын кэпсээтэ итиэннэ үбүлүөйүнэн истиҥник эҕэрдэлээтэ.

Аатырбыт тириэньэр, талааннаах учуутал И.М. Жирков туһунан кинигэни кэргэнэ Мария Жиркова уонна биллиилээх хайыһардьыт, сүүрүк Клавдия Шелковникова «Олоҕу таптаан умсугуйан олорбут алаас уола» диэн тапталлаах кэргэнин, эмиэ бэйэтин кэмигэр биллиилээх ыспарсымыан туһунан кинигэтин успуорт түмэлигэр бэлэхтээтилэр.

Бэтэрээн хайыһардьыт, сэбиэскэй-профсоюзнай үлэ, социальнай эйгэ салайааччыта Анна Бурнашева улууска хайыһар успуордун сайдыытын туһунан иһитиннэриини оҥордо. Салгыы куоракка олохтоох Уус Алдан успуордун бэтэрээннэрин сэбиэтин бэрэссэдээтэлэ, Спорт министиэристибэтин успуор үлэтигэр уонна чөл олоххо отделын инструктор-методиһа Зинаида Афанасьева эҕэрдэлээтэ уонна улуус дьаһалтатын баһылыга Василий Алексеев Махтал суруктарын Клавдия Шелковниковаҕа и Василий Аммосовка туттарда.

Хайыһардьыттары өрөспүүбүлүкэтээҕи успуор бэтэрээннэрин сэбиэтин бэрэссэдээтэлэ Гаврил Сивцев, хайыһар федерациятын чилиэнэ Анастасия Михайлова эҕэрдэлээтилэр.

Көрсүһүү иккис чааһа «Ис сүрэхтэн» төгүрүк остуол быһыытынан барда. Биир дьарыктаах биир дойдулаахтар хайыһардаах эдэр-сэнэх саастарын, кыайыыларын-хотторууларын, бастакы ситиһиилэрин, доҕотторун ахтан ирэ-хоро сэһэргэстилэр. Матрена Сивцева, Николай Костромин, Филипп Пестряков, Семён Черноградскай, Анна Бурнашева, Мария Кулаковская, Мария Жиркова, Алексей Пестряков, Михаил Матвеев, Александр Крылов уо.д.а. оҕо саастарыттан саҕалаан, хайдах хайыһардаабыттарын, тириэньэрдэрин, ситиһиилэрин, ахтан-санаан ыллылар.

Василий Тарскай успуордунан дьарыктаммыт кэмнэрин, өссө оскуолаҕа 8-с кылааска үөрэнэ сылдьан күннэтэ суруммут дневниктэрин – 5 халыҥ уопсай тэтэрээти илдьэ кэлэн, көрдөрөн дьонун сөхтөрдө, соһутта.

Бэтэрээннэр бэйэ-бэйэлэрин көрсөн, кэпсэтэн-ипсэтэн, санааларын сайа этэн, успуор түмэлин көрөн, үөрэн-көтөн тэрийээччилэригэр Зинаида Афанасьеваҕа истиҥник махтаннылар, өрөспүүбүлүкэҕэ хайыһар успуорда өссө сайдарыгар баҕаларын тиэртилэр. Кырдьыга даҕаны, биһиги тапталлаах Сахабыт сиригэр хайыһар успуордун сайыннарарга сүрүн усулуобуйа: хаар, уһун сыһыылар, киэҥ алаастар, үрдүк сыырдар-мырааннар, хайалар бааллар эбээт. Сахалар былыр-былыргыттан хайыһардьыттар, туут хайыһарынан киэҥ ыырдарынан сылдьан, бултаан-алтаан аһаан олорбуттара. Аҕа дойду Улуу сэриитигэр сахалар хайыһар биригээдэлэригэр өстөөҕү кытта сэриилэспиттэрэ.

Галина БОЧКАРЕВА.

Ааптар хаартыскалара.