Байыаннай дьайыы кыттыылааҕа Иван Ядрихинскай кэриэһигэр

Нам улууһун үөрэнээччилэригэр байыаннай дьайыы кыттыылааҕа, “Хорсун быһыы” орден кавалера Иван Ядрихинскай «Самурай» кэриэһигэр дуобакка хамаанданан турнир ыыттылар.

Намнааҕы 2-с нүөмэрдээх оскуолаҕа 13 оскуола 20 хамаандата нуучча дуобатыгар күрэхтэһэр.

Дуобаты сөбүлээн оонньуур 60 оҕоҕо Иван Ядрихинскай төрөппүттэрэ ситиһиилээх оонньууну, таһымнара улаатарыгар тылларын аныыллар, буойун уолларын туһунан истиҥник аҕыннылар.

Тоҕус туртан турар дуобакка тиһэҕэр диэри хайалара кыайара биллибэккэ турбута – оонньуур дьоҕур, тренер үөрэтиитэ, оскуола-оскуола уһуйуута атына көстөр.

Күрэхтэһии устата 44 очкону хомуйбут Намнааҕы 2-с нүөмэрдээх оскуола 1-кы хамаандатын дуобаччыттара Гаврильева Василиса, Мандарова Айнаара, Григорьев Коля кыайыылаах таҕыстылар.

Киниттэн биир эрэ очконан баһыйтаран Намнааҕы 1-кы нүөмэрдээх оскуола 2-с хамаандатын оонньооччулара Амбросьева Камилла, Матаннанов Айаал, Иванов Айсан буоллулар.

Үһүс бочуоттаах миэстэҕэ Намнааҕы 2-с нүөмэрдээх оскуола 3-с хамаандатын оҕолоро Кутуков Алеша, Терешкина Ангелина, Жирков Вася тахсаннар боруонса мэтээллэри кэттилэр.

Бүгүҥҥү дуобат муҥутуур кыайыылааҕынан Гаврильева Василиса ааттанан, велосипед хаһаайкатынан буолла. Оттон саамай эдэр оонньооччу аатын Хатыҥ Арыы оскуолатын 1-кы кылааһын үөрэнээччитэ Нестеров Арчын ылла.

Харысхан ПОПОВ.

Нам