Бөҕөстөрбүт утарсааччылара билиннилэр, эбэтэр сэрэбиэй хайдаҕый?

Албания Тирана куоратыгар спортивнай тустууга Европа чемпионата ыытылла турар. Номнуо гректии-римнии уонна дьахталлар тустуулара бүттүлэр. Аны муус устар 24 күнүттэн дьэ, биһиги кэтэспит – көҥүл тустууга күрэхтэһиибит саҕаланар.

Барыл быһыытынан, бары ыйааһыннарга сэрэбиэй оҥоһулунна, бөҕөстөр утарсааччылара билиннилэр.

Ол курдук, быйылгы чемпионакка саха тустууга кыһатын иитиллээччилэриттэн Арыйаан Тютрин 57 киилэҕэ, Владимир Егоров 61 киилэҕэ кытталлар. Бөҕөстөрбүт, бу чемпионакка анаан улахан сыаллаах-соруктаах анал бэлэмнэниини аастылар. Аны кинилэр иннилэригэр сүрүн сорук – Европа чемпионатыгар ситиһиилээхтик кыттыы буолар.

Көҥүл тустуу чемпионатын бастакы күнүгэр көбүөргэ – 57, 65, 70, 79 уонна 97 кг ыйааһыннаахтар тахсыахтара. Барылга олоҕуран кинилэр биир күн иһинэн финалга кимнээх тахсалларын быһаарсыахтаахтар. Онон, биһигиттэн күрэхтэһиини бастакынан Арыйаан Тютрин саҕалыыр.

Кини тустар ыйааһыныгар көрөргүт курдук барыта 13 бөҕөс баар. Манна, Тустуу аан дойдутааҕы холбоһугун (UWW) балаһыанньатыгар олоҕуран, рейтинг быһыытынан, Муса Мехтихановы (Россия) уонна Ислам Базаргановы (Азербайджан) бастакы уонна иккис нүөмэрдээх кыттааччы оҥорон, үөһээ уонна аллараа бөлөхтөрү баһылааччыларынан анаабыттар.

Сэрэбиэй быһыытынан, Арыйаан аллараа бөлөххө киирбит. Квалификация диэн ааттанар бастакы эргииргэ кини утарсааччытынан турок Юсуп Демир буолуо. Демир сааһа 24-дэ, быйылгы сылга киирэн баран Я.Догу (Турция) уонна Д.Колов (Болгария) турнирдарын иккис уонна үһүс миэстэлэри ылбыта. Тютрин — Демир тустуутугар кыайбыт бөҕөс салгыы эргииргэ Европа чемпионатын икки төгүллээх призера Ислам Базаргановка тахсыа. Өссө бу бөлөххө грузин Роберти Дингашвили баар. Биир тылынан, кытаанах киирсиилэр буолар чинчилээхтэр…

Хаһан баҕарар буоларыныы, биһиги бэйэбит бөҕөспүтүгэр ыалдьабыт уонна ситиһиини эрэ баҕарабыт!

Оттон Владимир Егоров күрэхтэһиини муус устар 25 күнүттэн саҕалыыр. Чемпионат хаамыытын биһиги сайтпытыгар – dzulurgan.ru уонна телеграмҥа каналбытыгар — t.me/dzulurgan кэтээн ааҕа, көрө сылдьаргытыгар ыҥырабыт.

Чемпионат, Дьокуускай бириэмэтинэн 17:30 чаастан саҕаланар.

Петр ПАВЛОВ.