Арыйаан Тютрин – Европа чемпионатын боруонса призера

Албания Тирана куоратыгар көҥүл тустууга Европа чемпионатыгар бастакы күн түмүгүнэн мэтээл иһин күүстээхтэри быһаарар хапсыһыылар ыытылыннылар.

57 киилэҕэ Беларусь чиэһин көмүскүүр саха тустууга кыһатын иитиллээччитэ Арыйаан Тютрин үһүс бириистээх миэстэ иһин киирсиигэ грузин Роберти Дингашвилины кытта көрүстэ. Бу хапсыһыыга Арыйаан хара ааныттан көхтөөхтүк, кимиилээхтик тустан, түмүккэ 8:3 ахсаанынан кыайыыны ситистэ. Итинэн кини син эмиэ былырыыҥҥытын курдук, Европа континенын боруонса мэтээлинэн наҕараадаланна.

57 кг: 1. Ислам Базарганов (Азербайджан), 2. Муса Мехтиханов (Россия), 3. Арыйаан Тютрин (Беларусь) уонна Манвел Хндрцян (Армения).

Ылан көрдөххө, Арыйаан Тютрин Европа чемпионатыгар бу төрдүс кыттыыта. Ол курдук, 2021 сыллаахха Варшаваҕа бэһис, 2024 сыллаахха Бухарестка ахсыс, 2025 сыллаахха Братиславаҕа үһүс миэстэлэри ылбыта. Аны билигин иккис боруонса мэтээлин ылары ситистэ.

Быйылгы сылга киирэн баран, Арыйаан үс күрэхтэһиигэ кытынна уонна үһүөннэригэр мэтээлэннэ. Бастаан, Красноярскайга Иван Ярыгин турнирыгар үһүс буолбута, онтон Минскэйгэ Александр Медведь түһүлгэтигэр бастаабыта.

Түгэнинэн туһанан, Арыйааны уонна кини тренердэрин – Саха сирин үтүөлээх тренердэрэ Семен Гаврильевич Петухову, Иван Иванович Дмитриеви эҕэрдэлиибит! Өссө үрдүк ситиһиилэри баҕарабыт!

PS: Арыйаан финалга тустуутун “Дьулурҕан” хаһыат телеграмҥа каналыгар t.me/dzulurgan көрүөххүтүн сөп.

Петр ПАВЛОВ.