Арыйаан мэтээлгэ эрэлэ сүтэ илик

Бүгүҥҥүттэн Европа көҥүл тустууга чемпионата саҕаланна. Көбүөргэ – 57, 65, 70, 79, 97 кг ыйааһыннаахтар таҕыстылар.

Эрдэ эппиппит курдук, биһигиттэн Арыйаан Тютрин (57 кг) туһунна. Кини бастакы эргииргэ турок Юсуф Демири очукуонан ыраастык (10:0) кыайда. Салгыы күрэхтэһиигэ Европа икки төгүллээх призера Ислам Базаргановы (Азербайджан) кытта көрүстэ.

Бу киирсиигэ биһиги бөҕөспүт 4:9 ахсаанынан хотторон кэбистэ. Ылан көрдөххө, тэҥ киирсиигэ сабырыйтарда. Хапсыһыы түгэнин “Дьулурҕан” телеграмҥа каналыгар – t.me/dzulurgan көрүөххүтүн сөп.

Аны финалга тахсар иһин хапсыһыылар хааллылар. Олор Дьокуускай бириэмэтинэн бүгүн 23:45 саҕаланаллар.

57 киилэҕэ Ислам Базарганов грузин Роберти Дингашвилины кытта киирсиэҕэ. Онно азербайджанец кыайар түгэнигэр, Арыйаан санааны уоскутар бөлөххө киирэн, боруонса мэтээл иһин киирсэр кыахтанар. Онон санааны түһэрэр табыллыбат, Арыйаан мэтээлгэ эрэлэ билигин да сүтэ илик.

Финал аҥарыгар көрсүөхтэрэ:

57 кг

Муса Мехтиханов (Россия) – Манвел Хндрцян (Армения)

Роберти Дингашвили (Грузия) – Ислам Базарганов (Азербайджан)

65 кг

Ислам Дудаев (Албания) – Ислам Гусейнов (Беларусь)

Башир Магомедов (Россия) – Вазген Теванян (Армения)

70 кг

Исмаил Мусукаев (Венгрия) – Александр Гайдарлы (Молдова)

Давид Баев (Россия) – Алексей Борута (Украина)

79 кг

Джабраил Гаджиев (Азербайджан) – Магомедхабиб Кадимагомедов (Беларусь)

Ахмед Усманов (Россия) – Зелимхан Хаджиев (Франция)

97 кг

Ахмед Магамаев (Болгария) – Абдулрашид Садулаев (Россия)

Батырбек Цакулов (Словакия) – Гиви Мачарашвили (Грузия).

Көрөргүт курдук, финал аҥарыгар барыта урукку ССРС көҥүл тустууга оскуолатын иитиллээччилэрэ таҕыстылар. Биир даҕаны болгар, турок, немец… суох.

Бу чемпионакка иккис бөҕөспүт Владимир Егоров (61 кг) сарсыҥҥыттан тустар.

Петр ПАВЛОВ.