Арыйаан боруонса иһин тустуоҕа

Албания Тирана куоратыгар көҥүл тустууга Европа чемпионата үгэннээн ыытылла турар. Бүгүн иккис күнэ – финаллар.

Бөөлүүн финалга тахсар иһин тустуулар буоллулар. Чемпионат бастакы күнүгэр биһигиттэн Беларусь чиэһин көмүскүүр Арыйаан Тютрин (57 кг) көбүөргэ тахсыбыта. Кини турок Юсуф Демири очконан ыраастык кыайан баран, азербайджанец Ислам Базаргановка 4:9 ахсаанынан сабырыйтаран кэбиспитэ.

Салгыы күрэхтэһиигэ – финалга тахсар иһин киирсиигэ Базарганов грузин Роберти Дингашвилины 11:1 ахсаанынан эрэллээхтик кыайда. Онон биһиги Арыйааммыт салгыы күрэхтэһэр буолла. Кини боруонса мэтээл иһин Дингашвилины кытта киирсиэ.

Бөҕөспүтүтүгэр ыалдьабыт. Арыйаан, кытаат!

Чемпионакка иккис кыттааччыбыт – Владимир Егоров (61 кг) күрэхтэһиини бүгүҥҥүттэн саҕалыыр.

Бүгүҥҥү финалларга тустуохтара:

57 кг Муса Мехтиханов (Россия) — Ислам Базарганов (Азербайджан)

65 кг Ислам Дудаев (Албания) — Башир Магомедов (Россия)

70 кг Александр Гайдарли (Молдова) — Давид Баев (Россия)

79 кг Магомедхабиб Кадимагомедов (Беларусь) — Ахмед Усманов (Россия)

97 кг Абдулрашид Садулаев (Россия) — Батырбек Цакулов (Словакия)

Мантан көстөрүнэн, Россия хамаандата билиҥҥитэ биэс ыйааһынтан – биэс финалистаах! Дьэ, эһиги санааҕытыгар, бүгүн хас кыһыл көмүс мэтээл кэлиэй?

Чемпионат хаамыытын туһунан (сонуннары, видеолары, хаартыскалары, статистиканы) “Дьулурҕан” хаһыат телеграмҥа каналыгар – t.me/dzulurgan көрүөххүтүн сөп.

Бүгүҥҥү күрэхтэһии эмиэ Дьокуускай бириэмэтинэн 17:30 чаастан саҕаланар. Бастаан бэҕэһээҥҥи ыйааһыннарга уоскутар бөлөх тустуулара, онтон хаалбыт биэс ыйааһыҥҥа барыллааһын хапсыһыылар буолуохтара. Оттон финаллар түүн 01:00 саҕаланаллар. 

Петр ПАВЛОВ.