Андрей Иннокентьев – Россия Кубогын кыайыылааҕа

Муус устар 20-22 күннэригэр Оренбург куоракка көбүөр маастардарыгар (аҕам саастаахтарга) спортивнай тустууга Россия аһаҕас Кубога ыытылынна. Бу күрэхтэһиигэ саха тустууга кыһатыттан иитиллээччилэриттэн спорт маастара Андрей Иннокентьев соҕотоҕун кытынна.

Андрей В дивизиоҥҥа 62 киилэҕэ гректии-римнии уонна көҥүл тустууга иккиэннэригэр күүһүн холосто. Түмүккэ гректии-римнии тустууга бастаата, көҥүл тустууга иккис буолла. Бу ситиһиитинэн кини күһүн Иорданияҕа буолар аҕам саастаахтарга аан дойду чемпионатыгар кыттар Россия сүүмэрдэммит хамаандатын састаабыгар киирдэ.

Манна сыһыары тутан эттэххэ, Андрей, соторутааҕыта аҕай ыытыллыбыт ССРС спордун маастара, Саха АССР үтүөлээх тренерэ Н.К. Алексеев — Матбор кэриэһигэр Саха сирин аҕам саастаахтарга чемпионатыгар бастакы миэстэни ылаат, тута ол күн Оренбурга айаннаабыта. Онон бэрт кылгас кэм иһигэр үс күрэхтэһииттэн – 2 кыһыл көмүс, 1 үрүҥ көмүс мэтээллэннэ.

Андрейы бу ситиһиитинэн эҕэрдэлиибит! Былырыын Венгрияҕа ыытыллыбыт аан дойду чемпионатыгар үһүс бириистээх миэстэҕэ тахсыбыта. Быйыл ол көрдөрүүтүн тупсарарыгар баҕарабыт!

Петр ПАВЛОВ.